Navigation – Plan du site

AccueilInformationsCrida en cors

Crida en cors

Crida a contribucions per un dorsièr de la revista Lengas a l’escasença son cinquanten anniversari e en omenatge a son primièr director : Robert Lafont

Lengas, Revue de Sociolinguistique, publicada desenant per las premsas universitàrias de la Mediterranèa, aurà complits 50 ans de vida en 2026, que foguèt creada en 1977 a l’Universitat de Montpelhièr Paul-Valéry, jos l’egide del Centre d’estudis occitans, per Robert Lafont e Philippe Gardy, que n’assegurèron successivament la direccion. Preniá la relèva dels Cahiers du Groupe de Recherche sur la Diglossie Franco-Occitane (GRDFO) (GRDFO) creats en 1974 al dintre de la meteissa Universitat.

Lengas es estada fidèla, al long d’aquel mièg sègle, a l’objectiu enonciat en preambul a son primièr numèro (1/1977, p. 6) :

« [prepausar] dos còps per an (en abril e en novembre) un ensemble de trabalhs que seràn orientats segon tres direccions complementàrias. Primièr, la revista publicarà jos forma d’articles de sintèsi, de documents comentats, de testimoniatges de cercaires o de locutors encontrats dins lo trabalh d’enquèsta, l’estat de la recerca sus la diglossia franco-occitana. Una plaça importanta serà facha puèi a las recèrcas menadas sus una matèria similara en França, en Euròpa e dins lo Mond ».

De tèxtes de tota mena publicats dins nòstra revista an permés de documentar e de melhor comprene la situacion lingüistica occitana, e mai plan d’autras vesinas o mai luènhas, en particular pel mejan del concèpte de diglossia. A l’entorn d’aqueste darrièr e de son interpretacion son estats prepausats tot un escach d’espleches conceptuals e practics que permeton d’afinar la metodologia de l’enquèsta de terren, de rendre mai assegurat lo diagnostic sociolingüistic e partent d’aquí de considerar las possibilitats e los mejans d’una inversion del procès de minoracion e de substitucion. Totes los qu’an contribuït o contribuïsson a la vida de Lengas, se pòdon felicitar de la plaça actuala de la revista dins la reflexion sociolingüistica francesa e europèa, romanica en particular.

Aqueste numèro serà tanben escasença de testimoniar de nòstra reconeissença scientifica de cap als fondators de la revista: Robert Lafont e Philippe Gardy, en fasent viure e en renovelant las recèrcas qu’an engatjada e amodadas.

Cinquanta ans es un anniversari que s’amerita de celebrar : deu èsser l’escasença de far un bilanç critic de las òbras complidas e a l’encòp de prepausar benlèu d’endrechièiras novèlas e de novèls apròchis sociolingüistic. Aquò desiram per noirir lo N° 100 de 2026 qu’aquesta crida nos e vos i convida.

Aquel N° 100 aurà per títol :

Lengas, 50 ans de sociolingüistica implicada. L’apòrt de Robert Lafont

Desiram, sens limitacion, recebre de contribucions a l’entorn dels aisses seguents :

- La creacion, l’istòria, la recepcion de la revista Lengas, sa plaça dins lo païsatge scientific.

- Los concèptes e las nocions de la sociolingüistica montpelhierenca (diglossia, conflicte lingüistic, foncionaments diglossics, intercessor de la nòrma …): lo ròtle de la revista Lengas dins sa difusion, son elaboracion, sa discussion.

- L’analisi sociolingüistica de la literatura, notadament en situacion diglossica.

- La contribucion de Lengas a la reflexion sus la nòrma lingüistica e a la normativizacion de l’occitan.

- La plaça de la sociolingüistica dins la lingüistica, domeni autonòm pels unes, luòc de sintèsi e de fondacion per la teoria praxematica avançada per Robert Lafont.

COMITAT SCIENTIFIC E D’ORGANIZACION :

Carmen Alén Garabato, Klaus Bochmann, Emili Boix, Henri Boyer, Jean-Yves Casanova, Romain Colonna, James Costa, Jean-François Courouau, Philippe Gardy, Narcís Iglésias, Georg Kremnitz, Christian Lagarde, Hervé Lieutard, Philippe Martel, François Pic, Gentil Puig i Moreno, Patric Sauzet, Claire Torreilles, Marie-Jeanne Verny, Alain Viaut.

CONTACTE :

50ans-lengas@univ-montp3.fr

DATAS DE RETÉNER :

- Publicacion de la Crida : setembre de 2025

- Depausa de las proposicions a l’adreiça 50ans-lengas@univ-montp3.fr (tèxt de 3000 signes lo pus mens) : al mai tard lo 13 de decembre de 2025

- Responsas als autors (acceptacion amb o sens modificacions, refús motivat) e rapèl de las nòrmas de la revista : al mai tard lo 20 de genièr de 2026

- Retorn dels tèxtes a l’adreiça 50ans-lengas@univ-montp3.fr (unes 40000 signes max.) : 30 de junh de 2026

- Retorn de las evaluacions als autors : 3 d’octobre de 2026

- En cas de modificacions (leugièiras) demandadas, los tèxtes definitius son de tornar al pus tard lo 15 d’octobre a l’adreiça 50ans-lengas@univ-montp3.fr .

- Sortida del n° 100 : auton de 2026

Rechercher dans OpenEdition Search

Vous allez être redirigé vers OpenEdition Search