Navigation – Plan du site

Pau Gairaud, de la desfacha de 1940 a la resisténcia

Jòrdi Blanc

Résumés

Paul Gairaud (1898-1994), né à Séverac-le-Château, a fait carrière dans l’Enregistrement des domaines. Après avoir été blessé en 1914-1918, il a écrit deux romans en français, puis toute son œuvre littéraire sera en occitan (Lo Libre del Causse, Lo vièlh Estofegaire). Auteur d’une publication « maréchaliste » au printemps 1941 (Imajos de l’An Quaranta), il s’engage dans la Résistance dès l’automne de 1941. A la lumière de ce nous pouvons savoir et de sa production littéraire, comment expliquer son itinéraire ?

Haut de page

Texte intégral

1Joseph Paul Fortuné Gayraud nasquèt lo 1èr d’abrial de 1898 a Severac del Castèl, d’un paire peirièr e d’una maire modista-capelièira. Faguèt carrièira dins l’administracion de l’Enregistrament. Coma agent, puèi contrarotlaire, puèi receveire ; en Còrsa, en Ardecha e dins la region parisenca. Prenguèt sa retirada en 1943, e moriguèt en 1994 a Montpelhièr. Ancian combatent de la guèrra de 1914 n° 44 209, grand blaçat, Crotz de Guèrra, Medalha militara, i perdèt, coma Enric Molin, lo bras drech. Son primièr encontre amb la guèrra… E portèt tot lo demai de sa vida una protèsi que li valguèt l’escais de Pata de fèrre.

2La prusina d’escriure lo trapèt. I s’ensajèt en francés amb dos romans que publiquèt, tot probable a compte d’autor : Pourtant elle t’aimait (1931), Les Amours de Marius (1932). Pren la carta de la Société des Gens de Lettres en 1932. Pr’aquò, tre 1930, se fa portar Felibre manteneire, abans de passar pus tard Mèstre d’òbra.

3Del temps qu’es a Sant Chèli d’Apcher en Lozèra, fonda la revista La Campano que, del mes de junh de 1937 al mes de març de 1938, publica dètz numèros. N’es lo director… e probable lo mecena. Mentre que Mouly, alara a Vilafranca de Roergue n’es lo redactor, aumens sul cartabèl. E l’estampaire Subervie, de Rodés, lo gerent. I publica los Roergasses Calelhon, Vaylet, Mouly, Fournier, mas tanben d’Albigeses : Bossac, e Loïsa Paulin, qu’anèt veire a Reialmont, e lo Païbassòl Còrdas.

4A son nom o jos l’escais de Lou Campanié, i fa paréisser sos premiers tèxtes en occitan : doas novèlas, L’Aspic e Lo Bandit Marelli, que se debana en Còrsa, e un primièr roman, Clamenç ou le Viol de Pise, amb una revirada françesa, que demorarà inacabat.

5La revista s’atuda amb la guèrra de 1939-1940, son segond encontre amb la guèrra, coma maites de sa generacion que foguèron marcats a vida per la primièira. Mas la desfacha de 1940, lo fa pas calar.

L’An Quaranta

6Totjorn a cò de Subervie, publica Imatjos de l’An Quaranta / Images de l’An Quarante. Récits et nouvelles en langue d’oc, avec adaptation française, Rodez, Éditions de La Campano, Imprimerie Subervie, Rodez, visà de la censura del 23 de març de 41.

7L’An Quaranta ? Es evidentament de l’an 1940 que s’agís, lo de la desfacha.

8L’An Quaranta : una expression que li agrada, amb tota sa polisemia e que trapam sovent jos sa pluma. Sufís de jogar suls sègles.

9Li balha lo títol del primièr tòme del Vièlh Estofegaire : Una filha de l’An Quaranta (1975). Dins aquela sagà que se debana del sègle XIX al sègle XX, es de 1840 que s’agís – data que li sembla marcar una modernizacion dins l’economia e los transpòrts.

10L’expression an quaranta remonta a un sègle en rè : « De grands malheurs et même la fin du monde avaient été prédits pour l’année 1740 ; mais rien n’arriva, et l’on rit depuis des faux prophètes et de leurs prédictions », indica Aimat Vayssièr, citat per Mistral dins lo Tresor dóu Felibrige que balha a l’expression un autre sens : « Remanda quaquarèn à l’an quaranto, renvoyer quelque chose aux kalendes grecques » que vendriá de l’expression : « se trufa de quicon coume de l’Alcouran, et par corruption : de l’an quaranto. »

11Alara ? L’An Quaranta del sègle XX : una annada de malastre e de cambaviraments ? O de desbaruta e de derision ? Lo libre es pas ni una analisi istorica ni tanpauc un manifèst politic, quitament pas una proclamacion d’adesion explicita a la « Revolucion nacionala ». Quicòm d’impressionista, mas sus l’aire de « Maréchal nous voilà », compausat d’una tièira de tablèus :

  • « La junesso de mon pais », dedicat a Enric Mouly.

    • 1 Julieta Dissèl, pseudonim d’Aimée Juliette Marguerite Peine (Issel, 1902 - 1962), comediana, excele (...)

    « L’accordéon », dedicat a Julieto Dissèl 1, ont, dins lo trin de Milhau a Severac e als monts d’Auvèrnha, un accordeonista buta una borrèia, faguent doblidar als viatjaires totes lors pensaments.

  •  « Dounaires de sang » : lo 5 de junh de 1940, a París, a l’espital Saint-Antoine, joves e vièlhs, proletaris o borgeses se ronçan per balhar lor sang e complir lor dever patriotic.

  •  « Balhent Paris », totjorn a París, al polit temps de prima, lo dimenge 9 de junh de 1940. Mentre « l’enemic a saltat la Somme, […] lous carris armats sou à Forges-les-Eaux », e restontís lo canon, mas la vida contunha, coma se de res non èra.

  •  « Esper » que conta la recepcion al país nòstre de fòrabandits d’Alsàcia-Lorrena.

  • 2 Josèp Vaylet (Sant Genièis d’Olt,1894 –Espalion,1982), un dels fondators del Grelh roergàs (1921), (...)

12D’una faula : « Las Abelhos et lou Repotegaire », dedicada a Josèp Vaylet 2. Una faula de las abelhas, non pas dins lo biais de la de Mandeville que mòstra cossí los vicis privats contribuisson al benaise public (1714), mas qu’ensenha que l’avenidor dont mai melhor serà se totas las abelhas, a plaça d’eissamar, e de voler menar caduna lor vida de son costat, fan prodèl al meteis bornhon.

13E d’una novèla, dedicada a Loïsà Paulin, « Lou Russo de Meli », pichona istòria d’un refugiat mal acceptat e de l’amistat que li pòrta una filhona de dètz ans.

14Faula e novèla, coma los diferents tablèus, se rapòrtan a la situacion de 1940-1941. E lo ton d’ensemble es lo d’una exaltacion de la vida, de la joventut e de la santat, dins lo biais de l’estrambòrd e del vam molinencs. De la frairièira, entre los del país que totes, vièlhs o joves, parlan sa lenga, del civisme dels Parisencs, pichons o gròsses. Sus un fons de critica dels politicaires, que viran lor vèsta segon lo moment e lor interès, coma aquel Parladís, patriòta en 14, deputat-mèra comunista a la velha de 1940. E de las divisions politicas, contra totes los que pretendon ne saupre mai que lo Maréchal.

15Amb pr’aquò una oposicion entre los ancians que faguèron la Guèrra de 14, que ne tornèron nhafrats o cambiats, e los que, fresques e risolièrs, s’entòrnan de la darrièira.

  • 3 Compagnons de France : movement fondat lo 25 de julh de 1940 en Zòna Sud qu’es pas tan demorat dins (...)

16En cèrca de çò que poiriá sauvar França. Coma aqueles Compagnons de France, movement de joventut fondat tre 1940 3 que paradan en tenguda, beretas e camisas blavas e cauças cortas, e que pr’aquò oblidan pas de saludar un vièlh de 14 que los agacha.

Lo resistent

17Imajos de l’An Quaranta es publicat amb visà de la censura del 23 de març de 41. Al mes d’octòbre de 1941, Pau Gairaud es marcat membre del MLN (Mouvement de libération nationale, creat en 1940), puèi membre actiu dels MUR (Mouvements unis de la Résistance, recampament creat lo 26 de genièr de 1943), n° 01605, maquisard de las FFI, n° matricul : 1498, unité R 36. Reconegut coma membre de l’Amicale des Anciens du Maquis, n° 33, al títol de maquisard, lo 10 de genièr de 1945.

18De la prima a la davalada, del 23 de març de 1941 al mes d’octòbre de 1941, blaçat de la Guèrra de 14 e manquet, marechalista en 1941, Pau Gairaud passa a la Resisténcia. Un reviral lèu fach, mas que deu pas susprene. I agèt de marechalistas resistents. Coma maites als Compagnons de France, als Chantiers de la Jeunesse o a l’École des cadres d’Uriage.

19Ont anèt ? Qué faguèt ? Quin foguèt son ròtle ? Pau Gairaud daissèt pas cap de raconte ni de memòri personals, mas testimonièt per d’autres.

20Tre 1945 publiquèt una brocadura : Le commandant René, maquisard de l’Aveyron, reprenent los articles publicats dins L’Aveyron libre, n° 41, 42, 43 (27/07, 03/08, 10/08 1945). Lo comandant René ? René Arète, protestant, paracasudat le 12 juin 1944 sul causse desèrt d’En Gairescas a 10 km de Severac del Castèl e tuat a l’occasion d’un escambi de presonièrs lo 1er d’agost de 1944 a Cantarana prèp de Severac. Après solament un mes et mièg de sejorn en Rouergue, daissarà un fòrt sovenir coma delegat militar despartimental.

21En 1946, reprenent los articles sus las operacions del maquís d’Avairon, pareguts dins L’Aveyron libre del n° 2 al 6 d’octòbre de 1944 al n° 46 del 7 de setembre de 1945, publica lo primièr libre sus la Résisténcia en Roergue, La Guerre du Brassard, Maquis du Rouergue. Amb noms de personas, de luòcs e un fum d’entresenhas. Mas amb un avant-propaus modèst per una tièira d’eveniments que van de Cantal e d’Aubrac a Viaur e al nòrd de Tarn : « Ceci n’est pas une histoire complète de la Résistance et des maquis rouergats, mais le récit, aussi exact que possible, de quelques faits marquants » (7).

22Amb totjorn lo meteis ideal d’union. Pas mai lo de 1940, jol retrach del Maréchal, mas lo de 1944, a la glòria de la Resisténcia :

Le brassard tricolore à croix de Lorraine.
Paysans, ouvriers, intellectuels, catholiques, protestants, israëlites, athées, monarchistes, républicains « modérés », garçons versés dans la politique « de gauche », tous portaient fièrement, au bras ou sur le cœur, comme un défi à l’oppresseur, comme un emblème de sacrifice, comme un insigne de liberté, cette croix à double potence.

Maquisards.
Croisés de 44 (29).

23Vint ans pus tard, foguèt question d’una reedicion.

24En 1971, pensant mai que mai als joves, F. Campergue, de Nuça, director d’escòla onorari e correspondent per Avairon del Centre d’Histoire de la Seconde Guerre mondiale, li escriguèt : « Je crois qu’avec votre réédition de La Guerre du brassard, histoire romancée, cela ne peut que […] permettre ainsi davantage de faire connaître cette belle page d’histoire de notre Rouergue. » Çò que li valguèt un brave rebufal.

25Responsa de Gairaud a l’« historien officiel » :

  • 4 Correspondéncia privada.

J’ai été bien tristement surpris en lisant, dans votre lettre l’expression histoire romancée appliquée à mon livre. […] La Guerre du brassard n’est pas une fiction ; tous les acteurs dont on parle sont désignés par leur vrai nom ; et les lieux aussi où se déroulèrent tels et tels événements. […] Un récit vivant peut présenter les faits avec une exactitude rigoureuse ; et des pages froides, mornes, aussi plaisantes qu’un rat mort, peuvent être farcies d’erreurs4.

26Pas question de reedicion pel moment. Tanplan pus tard se ne vira, o pas jamai.

Lo Repotegaire

27La Liberacion venguda, Gairaud contunha sa collaboracion a L’Aveyron libre, journal dels MUR, engimbrat per Georges Subervie. Del 29 de setembre de 1944 (n° 1) al 29 de novembre de 1945 (n° 56). En francés e en occitan amb per títol : Acos aital, praco, e per escais Lou Repoutegaire, del 6 d’octòbre de1944, n°2, al 19 d’octòbre de1945, n° 50 (Zéfir Bosc, 2013). Unes cinquanta bilhets en tot.

28Lo 17 de julh de 1944, l’endeman del massacre de Radagonda, ont trenta ostages foguèron fusilhats, los Alemands quitèron Rodés e se repleguèron cap al País Bas.

29Sovent novèls venguts, los resistents occupèron la vila : las ostalariás, los restaurants. Impossible de s’albergar.

30Resistir contra la Resisténcia : aquí son cap d’òbra. Non pas literari saique. Per aquò far i a Lo Libre del Causse o Lo vièlh Estofegaire, segon lo vejaire de cadun. Mas de segur son espet d’òme, son cap d’òbra politic, que ne ditz mai sus l’individú Gairaud que tot çò que se’n poiriá dire.

De la vida a l’òbra

31Son òbra occitana compren sièis romans publicats de 1968 à 1982 : Lo Libre del Causse (1968) e Lo segond Libre del Causse (1970). E los quatre tòmes de la sagà del Vièlh Estofegaire : Una filha de l’An Quaranta (1975), Riqueta (1978), Per las Colonas de Tarn (1980), La Sèxòlòga (1982).

32E una novèla de sciéncia ficcion : L’Annada 2065. Raconte futurista (1983).

33Per rapòrt a Mouly e al Grelh Rouergàs, passam d’una literatura basada sus la bòria e lo trabalh, la femma, esposa, maire e serviciala, dins un encastre tradicional roergàs, que pòt èsser tanplan la vila, e qu’es pas sonque roergàs (Montpelhièr, Tolosa, Corsèga, Marròc), a l’asprum dels caractèrs, als afars d’argent, al sèxe e a de personatges que son pas sonque de paisans mas tanplan de notaris, de militars o de religiosas. De Mouly a Bodon, Gairaud es mai qu’un cadenon de manca (Ives Roqueta, 1991, 1994).

34Quin resson de la guèrra, de la politica e de la Resisténcia trapar dins son òbra ?

35Lo Libre del Causse, una sagà sus tres generacions, es un dels melhors romans occitans d’ara. Per la lenga, lo vocabulari e la sintaxi. Per l’intriga, de la primièira pagina del primièr libre a la darrièira pagina del segond. Per son inscripcion dins l’espaci : lo causse roergàs, amb sa tombada fins a Montpelhièr. Per son inscripcion dins l’istòria : lo temps d’abans 1914, la Guèrra de 14-18, l’entre-doas guèrras, la desfacha de 1940, l’Occupacion e la Resisténcia, l’après guèrra, fins a 1968, annada de la parucion dels segond tòme.

36Lo roman es l’art de la complexitat e de l’ambiguïtat. E es pas lo luòc, per un autor, de i far mòstra de sas opinions politicas. Mas, sul jove Gairaud, i a pr’aquò un passatge que nos pòt far lum, un tròç del capítol VIII del primièr libre, titolat « La misèra » ont se tracha del paure mond d’aquel temps.

37Sèm a Rodés en 1913, dins una escòla religiosa. Dos camaradas, Pau, quinze ans e Simon, « unes vint meses de mai », se parlan de rescondons dins la cort, sens qu’aquò esclaqueje a las aurelhas del director o de qualque fraire. A Pau, lo caussenard que li parla d’« un obrièr sans trabalh que demanda l’aumòrna » a sos parents, Simon l’Albigés li conta qu’anèt un jorn a Caramauç per ausir Jaurés. E « cossí aquela voètz enfuocava lo monde, vos dintrava dins lo cur, vos torciá los budels ». E cossí quitament « las montanhas l’escotavan ».

38E Pau li conta cossí èra content, quand èra a l’escòla de Severac, de donar lo sòu al paures que venián tustar a la pòrta de sa maire modista-capelièira. Entre lo personatge del roman e lo jove Pau, tot s’endeven : pichon nom, atge, luòc e mestièr de la maire.

39Dins lo roman, çò que pren lo pus de larg, es lo periòd de la Resisténcia, del capítol VIII al capítol XIII del Segond Libre.

40Titolat « L’an Quaranta » – encara ! –, lo capítol VIII, conta la mobilizacion del mèstre vailet de la Bòria nauta de Sarnac, evòca la guèrra de 40, la desbaruta (l’exòdi) e la crida del 18 de junh.

41Al capítol X, titolat « L’an Quaranta dos », ven lo temps de las restriccions : pas d’essença e la mangilha manca. Lo 11 de novembre de 1942, es l’ocupacion de la zòna Sud. « A la prima de 1943, montèt a Sarnac, un crane monsur », conta Gairaud, un oficièr de 14 qu’ensaja de ramosar de mond per la Milícia.

42Amb lo capítol XI, titolat « De rescondons », començan  las manòbras politicas. La Gestapo ròda, e s’ausís parlar de tortura. Mas tanben de Resisténcia. Lo capítol XII, « Sanctus capbord », met en scèna un Lieutenant-colonel Darquier, marquís, milician, francisca a la botonièira. L’antisemitisme sevís. La Bòria Nauta servís de rescondilhièra pels josieus. Amb lo capítol XIII, « L’An Quaranta quatre », ven la prima de 44, e tornar la Gestapo, mentre lo cabdèt de Palfèrre s’escapa del seminari pel maquís, dins los bòsques d’Aubrac. Lo país liberat, los maquís de Roergue davalan fins al Clapàs.

43Sèm luènh de la legenda militanta de la creacion d’un IEO, presentat coma un organisme « eissit de la Résisténcia », coma de la contristòria del Joan Larsinhac de Robèrt Lafont. Amb Gairaud, vertadièr resistent, e que ne faguèt pas jamai un afar personal.

Haut de page

Bibliographie

Obra de Pau Gairaud en lenga francesa

Pourtant elle t’aimait, Paris, Éditions de la jeune Académie, 1931.

Les Amours de Marius, Imprimerie Fra, Foix, 1932.

Le commandant René, maquisard de l’Aveyron, Rodez, Imprimerie Subervie, 21 rue de l’Embergue, 1945.

La Guerre du Brassard, Maquis du Rouergue, Paris, Éditions Jeannne Saintier, 1946. (Imprimerie Subervie à Rodez).

Obra de Pau Gairaud En lenga occitana

Una filha de l’an quaranta, Rodez, Subervie, 1975.

La guerre du brassard : maquis du Rouergue, Paris, J. Saintier, 1946.

Lou libre del Causse ; préf. d'Enric Mouly, Rodez, Imprimerie Carrère, 1968.

Lou segound libre del Causse, Rodez, Imprimerie Carrère, 1970.

Lo vièlh estofegaire 1, Una filha de l'an quaranta, Vedena (84270), Comptador generau dau libre occitan, 1975.

Lo vièlh estofegaire 2, Riqueta, Rodez, Subervie, 1978.

Lo vièlh estofegaire 3, Per las colonas de Tarn, Rodez, Subervie, 1980.

Lo vièlh estofegaire 4, La sèxòlòga, Rodez, Subervie, 1982.

« L’Annada 2065. Raconte futurista », Contes e novèlas del Roèrgue, Rodés, Lo Grelh Roèrgas 6, segond trimèstre de 1983.

Bibliografia segondària

Bòsc, Zéfir, 2013, Los Bilhets del Repotegaire. Du 6 octobre 1944 au 19 octobre 1945. Écrits de Paul Gayraud, Rodez, Lo Grelh roergàs.

Roqueta, Ives, 1994, « Atot e ratatot : Pau Gayraud coma Enric Mouly, los romancièrs ‘incontornables’ », Revue du Rouergue n° 26, été 1991, 247-261.

Roqueta, Ives, Un autre Rouergue… celui de Paul Gayraud, [Rodez], [s.n.].

Haut de page

Notes

1 Julieta Dissèl, pseudonim d’Aimée Juliette Marguerite Peine (Issel, 1902 - 1962), comediana, excelenta interprèta del repertòri poetic e teatral d’òc, fondatritz dels Amis du théâtre d’oc et productriz d’emissions occitanes a Radio-Toulouse.

2 Josèp Vaylet (Sant Genièis d’Olt,1894 –Espalion,1982), un dels fondators del Grelh roergàs (1921), majoral del Felibrige (1955), creator e conservator del musèu d’Espalion.

3 Compagnons de France : movement fondat lo 25 de julh de 1940 en Zòna Sud qu’es pas tan demorat dins las memòrias coma los Chantiers de la Jeunesse.

4 Correspondéncia privada.

Haut de page

Pour citer cet article

Référence électronique

Jòrdi Blanc, « Pau Gairaud, de la desfacha de 1940 a la resisténcia », Lengas [En ligne], 85 | 2019, mis en ligne le 28 février 2019, consulté le 20 septembre 2019. URL : http://journals.openedition.org/lengas/2835 ; DOI : 10.4000/lengas.2835

Haut de page
  • Logo Presses universitaires de la Méditerranée
  • OpenEdition Journals