Navigation – Plan du site

AccueilNuméros90La nòva cançon occitana e la soci...

La nòva cançon occitana e la societat miègjornala

Yan Lespoux

Résumés

À partir de la fin des années 1960, la Nouvelle chanson occitane (NCO) devient un vecteur important de transmission des thèmes occitanistes dans la société méridionale. Elle fait aussi, en retour, écho aux luttes sociales qui sont menées dans l'espace d'oc durant cette période. L’œuvre de Claude Marti et son engagement, en particulier dans la lutte des viticulteurs languedociens, illustre bien ce mouvement.

Haut de page

Texte intégral

  • 1 Martí, Claudi, « Lo país viu al present », Ventadorn, 1969.

Al servici del pòble lutam.
Siám sortits del silènci, lutam.
La paraulas es presa, lutam.
E d'autres, d'autres, d'autres, d'autres
Se son levats aicí que dison:
«La colèra s'assolida
De pertot al meteis temps
La vergonha es abolida
Lo país viu al present.1

1 En 1969, Claudi Martí, amb la cançon « Lo país viu al present » plaça clarament la Nòva cançon occitana (NCO), que n’es segurament son representant mai famós, dins un encastre de luta sociala e mai largament de luta de liberacion o d’emancipacion. Los mots cantats aquí venon resumir çò qu’es la retorica occitanista majoritària d’aquel temps, impregnada de marxisme e que vòl tocar las massas occitanas. Aquelas massas – lo pòble d’òc – alienadas, las cal despertar, las cal ajudar a dubrir los uèlhs sus lor condicion. Per aquò faire, lor cal parlar dins lor lenga mas subretot lor parlar de çò que vivon cada jorn, religar la revendicacion occitanista a lors problèmas concrèts. Aital, e mai que mai après 1968, la NCO se liga a un cèrt nombre de lutas socialas occitanas o denóncia de faits socioeconomics que ne patís l’espaci occitan. Es un torn parcial que prepausam de faire aicí : nos interessarem mai que mai a la figura de Claudi Martí e a son investiment dins las lutas del Lengadòc viticòl e ensajarem de véser quin resson a poscut aver la NCO dins aquesta societat. Aquò nos empacharà pas, çaquelà, de seguir en filigrana l’evolucion de la cançon d’òc e son insercion dins lo movement occitan d’aquela temporada de la fin de las annadas 1960 a la debuta de las annadas 1980.

Occitanisme, societat e consciéncia occitana

2 La NCO s’inscriu pas sus una pagina blanca. E mai que mai aquela cançon que, qualquas annadas après la mesa en musica dels poèmas de Robèrt Lafont e de Carles Camprós per Guiu Broglia, se sasís de las questions socioeconomicas que la creacion del Comitat occitan d’estudi e d’accion (COEA) a plaçat al centre de la revendicacion occitana dempuèi 1962 e la cauma dels minaires de La Sala. D’aquí es sortida e foguèt conceptualizada la question del « colonialisme interior ». En seguida d’aquò tanben l’occitanisme s’es sarrat dels clubs de la segonda gaucha e las teorias de Robèrt Lafont an fait lor camin dins l’esquèrra francesa fins a arribar d’alhors a çò qu’aquel pensaire de l’occitanisme siá editat dins d’ostals nacionals : La Révolution régionaliste pareis en cò de Gallimard en 1967 e Sur la France en 1968.

3 1968, justament, es un moment determinant per la societat francesa mas tanben per l’occitanisme. Se Robèrt Lafont aviá demissionat de son pòste de secretari general de l’Institut d’estudis occitans (IEO) en 1962 per menar lo COEA, daissant a l’Institut la carga de s’entrevar de cultura, Joan Larzac a pas las meteissas pudors quand, dins son rapòrt presentat a l’amassada generala de Mureth, en setembre de 1968, convida l’IEO a descolonizar los estudis occitans, fasent dintrar l’organisme de plan pè dins la revendicacion politica.

4 Aquel estagi de Mureth es tanben l’escasença d’un rescontre entre los occitanistas de l’IEO e un grop de Carcassoneses que ne fa partida Claudi Martí. Martí frequenta dempuèi qualque temps l’IEO. A assistit a d’unes acamps, coneis lo COEA. Es arribat a la fin d’aquel estagi amb d’afichas realizadas a Carcassona dins la seguida de mai 68 per un grop mesclant joves de las Belas Arts, militants occitans e viticultors qu’an creat un talhièr de serigrafia : representa la siloeta d’un òme acompanhada de l’eslogan : « Òme d’òc as la paraula. Parla ! ».

5 Claudi Martí ven pas d’enluòc. A una formacion politica comunista, a passat qualques setmanas a Cuba en 1965, foguèt nommat regent a Salsinha ont i a una mina d’aur e a frequentat aital lo mitan obrièr. Per el, lo messatge occitanista deu tocar lo pòble e l’aficha n’es un mejan coma o explica a Ives Roqueta a la fin de l’estagi de Mureth : « L’affiche c’est très important : il faut que les gens voient leur langue écrite, parce que dès qu’une langue est écrite ce n’est plus un patois. Or les gens qui parlent occitan, ils ne lisent jamais. Des livres je veux dire. Tandis que les affiches… » (Rouquette 1972, 37). E de contunhar : « Tu connais Raimon ? L’affiche c’est très bien. Mais pour réveiller les gens rien ne vaut la chanson. Les Catalans, eux, l’ont compris. » En plen temps de la protest song que se desvolopa justament fòrt en America del Sud, particularament al Chile, o en Catalonha, i a de qué pensar.

6 Dins lo meteis estagi, un Gascon, Pèir-Andriu Delbeau a tanben començat de trabalhar sus la cançon… çò que fa dire a Ives Roqueta qu’es aquí que nasquèt vertadièrament la Nòva cançon occitana.

7 Pels militants occitans de l’epòca, quicòm es a se debanar. An lo sentiment que lor paraula comença d’èsser ausida per d’instàncias politicas e pels mitans intellectuals d’esquèrra, coma Lafont o a mostrat, mas cal tanben capitar de tocar una populacion miègjornala que parla sovent la lenga mas n’a vergonha, que coneis pas son istòria e qu’es pas forçadament sensibla al messatge teoric de l’occitanisme.

8 Un eveniment cultural a ja permés de faire bolegar las causas al mens en Lengadòc. Es la difusion en març de 1966 a la television nacionala dins l’emission La caméra explore le temps del film en doas partidas de Stellio Lorenzi, Le Drame cathare. La revista Viure ne pren lèu acte :

  • 2 « Consciéncia occitana », Viure, n° 5, prima de 1966, p. 1.

[…] de milions de gents veson, s’arrèstan, s’interrògan, pensan que i a un problèma d’òc e que, coma que vire, ne caldrà tenir compte.
De milions, n’i aviá davant los pòstes de telé per assistir a las doas emessions de Lorenzi […]
La Renaissença d’Oc dempuèi un sègle èra un afar d’elèit mai o mens desvelhat. Ara pesa sus nosautres la lèi dels grands nombres. La desalienacion populara comença.2

9 Meteis constat del costat de Martí qu’explica dins son libre autobiografic :

Dès après l’émission, des milliers et des milliers de gens ont déferlé sur Montségur, et moi comme les autres. Je m’étais arrêté à Mirepoix pour acheter de la saucisse, et la première chose que me dit la charcutière, c’est :
« Vous avez vu cette émission ?
-Bien sûr. »
Et elle ajoute en occitan :

-Eh be, nosaus avem plorat quicôm ! (Marti 1975, 91)

10 Es, çò ditz, aquesta emission que lo mena a s’entresenhar mai suls catars, puèi sus Occitània e, enfin, a descubrir l’IEO.

11 Es encara çò que ditz Jean Vialade, un dels dirigents del movement viticòl audenc. Fa qualques temps qu’aviá començat a s’interessar a l’istòria locala quand vegèt l’emission :

L’émission de télévision de Stellio Lorenzi, « Le Drame cathare », qui a eu un retentissement énorme dans ce pays, est venu comme une ultime confirmation. C’est de l’histoire ancienne, peut-être. Mais pourquoi nous la cache-t-on encore dans les livres d’histoire officiels ? (Comités d’action viticole 1976, 218)

12Aquesta presa de consciéncia, la cal doncas espleitar. Deu permetre la joncion entre l’occitanisme e la populacion miègjornala e, tanben, en un temps ont Lengadòc subís una crisi sociala e economica pregonda, amb los movements socials.

La cançon camina dins la societat

13 Aquel ligam entre movement d’òc e societat es pas natural, o avèm dit. La cançon representa un vector privilegiat per començar de lo fargar e Martí, amb sas quatre primièras cançons, va participar d’aquel rescontre entre l’occitanisme e lo pòble. Un país que vòl viure fa lo constat de la desertificacion del país, de l’exòde de la populacion vèrs lo nòrd ; convòca tanben l’Istòria a travèrs Marcelin Albèrt, la Comuna de Narbona e los faidits – autant d’imatges d’un roman nacional occitan qu’es a se fargar – e met en davant la lenga (« Vòli cantar lo vent que parla en lenga d’òc »). L’Istòria a travèrs aqueste còp lo roman nacional francés es tanben presenta dins Perqué m’an pas dit, tant coma l’escafament de la lenga per l’escòla. Plaça tanben a la revendicacion qu’exprimís la cançon al dintre d’un movement internacional e quitament internacionalista : « Nos mascan la vertat. Aprendrem sols qu’en la Tèrra regna pas la libertat. Sauprem la talent de l’Índia, e lo dòl dels Africans, e la mòrt de Guevara ». Internacionalisme totjorn dins Occitania saluda Cuba, e, dins Las messorgas, tot aquò, l’exili, l’istòria confiscada, la lenga abandonada per fòrça e una alienacion partejada amb d’autres pòbles que son a se levar contra aquesta opression : « Atal t’an dit de messorgas, per te panar l’èime e lo còs. E siás pas mòrt. E te revelhas. Sarra los punhs. Sèm de milièrs e per lo mond farem plegar los messorguièrs ».

14 Lo messatge fa son camin e primièr al dintre de l’occitanisme ont la consciéncia d’aver enfin tocat quicòm d’essencial a travèrs la poesia nòva e la nòva cançon se fa mai aguda. E es interessant de legir dins un article de Robèrt Lafont per Viure lo resson de las cançons de Martí :

  • 3 Lafont, Robèrt, « Practica de la desalienacion », Viure, n° 18-19, ivèrn de 1969, prima de 1970, p. (...)

L’ondada nòva de la creacion, la tota nòva consciéncia nos meton au pè de la muralha ont s’escriu. Ara qu’escrivèm al present per un païs qu’el pòt pas viure qu’al present, cal pas que parlem per messorga. Ara intram dins la practica de la desalienacion. Cal èstre au mond. Coma es, el.3

15 Es un fait que las idèas portadas per l’occitanisme qu’es a se politizar mas tanben, mai largament, dins lo vam de la descolonizacion e de las diferentas lutas d’emancipacion dins lo mond, fan lor camin dins la societat occitana e mai que mai dins aquel Lengadòc que Stellio Lorenzi a començat de tocar amb son film e que la cançon occitana s’emplega a difusir. Es çò qu’explica d’un cèrt biais Jean Lacouture dins un article del Monde consacrat a la polemica a l’entorn de las celebracions del 700n anniversari de la mòrt de Sant Loís en 1970. Lo prefècte d’Aude voliá faire pausar una placa sus la paret del castèl de Pèirepertusa. Provoquèt la colèra del president del Conselh general, Georges Guille, que refusèt de finançar aquesta placa e declarèt : « Pourquoi pas, tant que vous y êtes, glorifier à Narbonne la mémoire de Clemenceau ? ». Vaquí çò que ne ditz Lacouture :

  • 4 Lacouture, Jean, « La célébration a réveillé une amertume en pays d’oc », Le Monde, 21 septembre 19 (...)

Quand des notables politiques peu préoccupés jusqu’alors […] de faire connaître leurs sympathies aux occitanistes, et que leur appartenance à la S.F.I.O. n’avait guère conduit auparavant à livrer des combats historiques pour l’honneur des cathares, jugent bon de prendre une position aussi tranchée, c’est que l’opinion y pousse. C’est que le climat y est favorable. C’est qu’un débat sur le rituel dissimule une crise plus profonde. C’est par exemple que l’ombre des victimes des Capétiens alimente la colère des producteurs de vin de l’Hérault, des éleveurs de brebis de l’Aveyron, des journaliers du Lot.
[…]
Mais qui s’étonnera que le renouveau de la culture et du pays d’oc s’exprime avant tout dans les domaines où s’est épanoui avant tous autres le génie provençal ou gascon […] celui du « trobar », des chanteurs-poètes, des musiciens-acteurs ? Un nom ici s’impose, celui de Claude Marty, ou Claudio Marti, Carcassonnais d’origine à demi catalane, qui sillonne depuis plus de deux ans les routes du Midi, sa guitare à la main. Trapu, le front immense, le regard triste, il chante d’une voix superbe et grave la colère des oubliés – vignerons de l’Aude et bergers du Causse, journaliers d’Aveyron et artisans du pays de Foix. Troubadour très politique dont les disques sont marqués de l’effigie du « Che », chansonnier rouge et noir, il ranime d’une voix de garrigues et de tramontane une langue que l’on disait à demi oubliée des jeunes, et donne un certain sens à la mélancolie des vieux
.4

16Quitament s’es d’esquèrra e engatjat dins l’anticolonialisme, doncas sensible als tèmas desvolopats per l’occitanisme, Jean Lacouture seguís de luènh çò que se debana en Lengadòc (e utiliza d’estereotips plan corrents). Pasmens, sentís plan que s’i passa quicòm, que d’idèas infusan al dintre de la societat e que la cançon i es pas per res.

17Cal dire que los cantaires occitans e Martí primièr son d’abòrd de mond que se produsisson sus scèna e que quadrilhan l’espaci. Dins las primièras annadas, Martí va d’en pertot en Lengadòc, del vilatge mai pichon a las salas mai grandas de las vilas coma Tolosa e Montpelhièr, çò que li fa tocar un public larg, coma o ditz dins una entrevista per Viure en 1970 :

  • 5 « Problèmas de la cançon occitana », Viure, n° 21, automna de 1970, p. 23.

Ai cantat davant d’estudiants, per exemple après los eveniments de Mai. Ai cantat amb Paco Ibáñez e Rivalta a Albi, a Lavaur, al Palais dels Espòrts de Tolosa, davant un public larg ; puèi som anat cantar dins los vilatges, del mai petit al mai grand. Dins un vilatjon, a Polhas (Tarn), ont i a pas que 37 estatjants, i aviá 200 personas ; venián de pertot. I a de publics de totas menas. I a lo public païsan, lo filh de païsan vengut estudiant, que, dins lo contèxte del vilatge, son pas parièrs coma a la vila. Puèi i a lo public de las vilas mejanas, coma Carcassona : fonccionaris, magistrats, institutors, professors, enfin totas las gents d’una petita vila administrativa del Miègjorn.5

18Per Martí, sas cançons desvelan pas res a las gents que los venon escotar mas permet de revalorizar la lenga d’un costat e d’un autre costat de faire emergir à l’encòp la discussion e un saber qu’èra ja present mas pas forçadament exprimit. Car, sovent, après lo concèrt comença la discussion entre lo cantaire e lo public, l’escambi que permet a cadun d’avançar sas idèias. Lo primièr espantat per aquestas reaccions e tanben per la consciéncia « occitana » de son public, es Martí el meteis :

  • 6 Ibid. p. 24-25.

Cal veire lo nivèl de la discutida. Es la discutida de la realitat presenta e lo grand punt d’interrogacion sus l’avenir. Òm se maina qu’ei quicòm a dire, mas aquò’s pas una revelacion que lor pòrti ieu : tot aquò, o sabián. Çò que nos a lo mai espantat, es que i aviá de tipes qu’avián lo certificat d’estudis que ne sabián mai que ieu, que conoissián la data de la crosada albigesa. Aquò es quicòm que m’a estabosit. Cada vèspre, i a un molon de gents, de joves e de vièlhs que te rapèlan la societat meridionala, las franquesas comunalas. […] Adonc es solid que bastava de pauc de causa per que tota aquela cultura, e mai lor istòria, que l’an conservada malgrat totas las persecucions, la manifestèsson.6

19Aquò pòt tanben suscitar de vocacions o al mens un desir de parlar la lenga en cò dels joves. Martí, encara, o explica :

  • 7 Ibid. p. 29.

Un exemple : Carcassona. Cantèri amb Brassens. Après, m’an demandat de cantar al licèu. I aviá un fum de mond. An fondat un glub occitan. Eran 150, sens professors. E n’i aguèt 150 que presentèron al Bac l’opcion d’occitan. Amb la cançon se pòt triplar, quadruplar, quintuplar lo nombre de mond que pòdon venir de militants de la revolucion occitana.7

20Es tanben çò qu’explica Ives Roqueta :

Du reste, lors des épreuves du baccalauréat, en juin 1971, les examinateurs ont été étonnés de voir tant de jeunes gens leur présenter les seuls textes occitans qu’ils ont pu se procurer et qui n’ont rien à voir avec la littérature proprement dite. Faute de maîtres, ils ont découpé des articles de la Dépêche du Midi, des textes de chansons.
À Carcassonne une jeune fille de Limoux y va carrément :
-Madama, la sola causa que vos pòsque presentar son las quatre cançons del disque de Marti, Lengadòc roge. L’ai crompat a Carcassona. Non, ai pas jamai ren legit en lenga d’òc en defòra d’aquò. Emai som estada plan espantada de veire sul papieron de las paraulas consí l’occitan s’escriviá. (Rouquette 1972, 64-65)

21E, pendent l’interrogacion, mentre que d’autres candidats reprenon las paraulas de Lengadòc roge, Roqueta, dins una scèna que podèm dobtar un pauc de sa complèta veracitat, mòstra cossí las cançons de Martí an sauput suscitar lo desir, un briu romantic, de revolucion en cò d’aquesta joventa qu’explica a l’examinatritz, jols uèlhs de Roqueta vengut véser çò que se debanava :

22I a pas que l’amor que vos pòsque metre a de bon l’enveja al còr de far quicòm. Per exemple sarrar lo punh, agantar un fusilh, per que càmbie lo temps, que las gent agen de qué viure. Quand òm aima, cal saber agir. Aicí i a fòrça misèra. (Comités d’action viticole 1976, 218-219)

La cançon al servici de las lutas socialas

23 D’autres qu’esitan pas a sarrar lo punh o a agantar un fusilh, son los vinhairons. Es amb eles que los concèrts de Martí van permetre d’establir pron lèu de ligams, e primièr pel biais de Jean Vialade, leader dels Comités d’action viticoles (CAV) dins Aude. Lo biais que lo rescontre se fa es contat a l’encòp per Vialade dins La révolte du Midi e per Martí dins Homme d’oc.

24 Vialade es d’aquesta populacion de païsans que coneisson l’istòria de lor region que ne parla Martí. Foguèt coma plan d’autres espantat per lo film de Stellio Lorenzi e, coma vinhairon, pòrta tanben en el tot lo raconte de 1907. Vaquí çò qu’escriu :

Quelque temps après [la difusion del Drame Cathare], ce qui prouve bien que la même idée cheminait de manière différente dans bien des esprits, donc qu’elle exprimait non pas la folie d’un individu mais bien une vérité d’époque, les chanteurs occitans sont apparus. Je ne les connaissais pas encore. Mais un jour, l’instituteur de Fabrezan qui s’appelait Crèvefosse, me dit : « C’est quelque chose d’un peu spécial, hein, il ne faut pas trop le dire, mais on va faire venir un de ces chanteurs occitans… » J’y vais, la veille il y avait eu des manifestations viticoles très violentes, et là j’ai ressenti un des plus grands chocs de ma vie. Ce chanteur, c’était Claude Marti.
[…] petit à petit, il s’est créé des liens, comme un tissu, et c’étaient les mêmes viticulteurs que l’on retrouvait occitanistes et que l’on retrouvait dans les comités d’action viticoles, pratiquement au niveau des gens les plus cautionnés par la base. L’état d’esprit occitan, l’état d’esprit comités d’action, c’était bien la même chose…
(Comités d’action viticole 1976, 218-219)

25 Martí apond de son costat que Vialade, quand venguèt lo véser a la fin d’aquel concèrt de Fabrezan, i diguèt : « Nous vous attendions depuis dix ans » (Marti 1975, 122).

26 Mas l’amistat que nais entre Martí e Vialade fa pas tot. Lo cantaire es respectat, e son messatge pertòca los vinhairons. André Cases, un autre leader dels Comités d’action viticoles o ditz dins un documentari televisat consacrat a Martí en 1977 :

Le Midi est un pays de traditions, c’est un pays de folklore, et la chanson, à un certain moment, a une résonnance et un aspect politique. Et là, Marti apporte quelque chose. C’est une chaleur qu’il apporte aux gens du Midi, et c’est un message qu’il apporte aux gens hors du Midi. Marti est certainement le point de liaison dans quelque chose qui vit dans une incompréhension très très grande.8 

27Mas aquò significa pas qu’una convergéncia entre lo movement viticòl e l’occitanisme es a se faire entre 1969 e la debuta de las annadas 1970. La realitat es qu’una vertadièra mesfisança existís en cò dels vinhairons cap als occitanistas, que Vialade exprimís clarament :

Si Marti a eu un tel écho, ce n’est pas parce qu’il nous faisait la leçon : il disait quelque chose qui était latent chez les gens, la chanson entrait en résonnance. Et de la rencontre naissait quelque chose, qui à son tour nourrissait les nouvelles chansons de Marti. C’est de cette manière que les idées progressent.
C’est pour cela et contrairement à ce que l’on croit souvent à l’extérieur que le mouvement politique organisé n’a pas eu d’impact sur le mouvement viticole. Une rencontre aurait pu se faire lors des manifestations de 1971, elle ne s’est pas réalisée, et c’est peut-être mieux ainsi. Il s’agissait surtout de jeunes des villes, des étudiants, des professeurs de faculté, qui ne connaissaient pas grand-chose à la réalité viticole mais en parlait avec autorité. Les donneurs de leçons de ce genre, nous n’aimons pas trop… Au début ils étaient pour la lutte viticole, et puis un an après nous ne valions plus rien : des poujadistes, le danger principal était la fascisation du mouvement, maintenant il faut faire de la « théorie » pour « politiser », « encadrer » les masses laborieuses. Merci : on ne lutte pas contre des maîtres pour s’en donner d’autres.
À voir leur sectarisme, leurs excommunications réciproques et leurs revirements à 100% tous les ans, de toutes manières il valait mieux d’abord qu’ils essaient de savoir ce qu’ils voulaient. (Comités d’action viticole 1976, 237)

  • 9 « La parole à Vialade », Lutte occitane, n° 5, novembre 1972.

28Interrogat per lo jornal Lutte occitane en 1972, Jean Vialade eludís d’alhors la sola question que li es pausada suls ligams entre lo problèma de la viticultura e lo problèma occitan. Se contenta de dire, en substància que « cette lutte ce n’est pas la lutte d’une seule classe de la société méridionale c’est une lutte de l’ensemble des classes socio-professionnelles de cette région »9. La causa que Vialade vòl faire avançar es la dels vinhairons. Se pòrta en el, coma o ditz, una idèia occitana, s’agís pas d’una idèia occitanista. E se los occitanistas trapan dins la luta dels vinhairons una de las resultas del colonialisme interior e una via, en la sostenent, per ensajar de difusar lors idèias revolucionàrias dins la societat miègjornala, son pas vistes coma de sostens fisables e encara mens coma de partenaris.

29Caldrà esperar 1975 per que i aguèsse una debuta de rapròchament vertadièr entre occitanistas e vinhairons. Es a dire après la scission del movement occitanista en seguida de la campanha de las eleccions presidencialas de 1974 ont Robèrt Lafont ensagèt d’èsser lo candidat de las minoritats. Es a aquela escasença que foguèron creats los comitats Volèm viure al païs (VVAP) encargats de recampar las signaturas de pairinatge per validar la candidatura de Lafont. Capitaràn pas (lo Conselh constitucional invalida una part de las signaturas) mas aqueles comitats subrevivon e actan lo fracàs de l’estrategia de Lutte occitane d’una articulacion amb los grands partits nacionals d’esquèrra. VVAP causís de son costat la via d’un gauchisme nacionalitari e quitament nacionalista per d’unes aspèctes. L’estructura de VVAP amb de comitats locals mai pròches de la societat ont vivon permeton aquesta amòrça de raprochament que ne parla Vialade per l’annada 1975, en doas fasas. Una primièra en març ont un rescontre es organizat a Confolenç, lo vilatge de Martí, entre de viticultors e de membres de VVAP e ont es signada una declaracion comuna en rapòrt amb lo blocatge del pòrt de Seta pels vinhairons :

Le 22 mars [1975] à Couffoulens (Aude), des responsables du CAV rencontrent le mouvement occitaniste VVAP (Volem viure al pais). A l’issue de la réunion, ils publient un communiqué commun : « La lutte des pêcheurs rejoint le combat des vignerons, des paysans du Larzac, des ouvriers de Chalabre. Dans tous ces lieux de lutte, ce sont les forces de l’argent qui sont dénoncées. L’Occitanie n’est ni une colonie, ni une monnaie d’échange. Tous à Sète le 26 mars.
Le 23, le blocus des ports méditerranéens devient presque total. Une vente sauvage de vin rosé est organisée à Pézenas par des jeunes agriculteurs.
La chanson occitane est au rendez-vous : après Patric, Marie Rouanet, et l’abbé Jean Larzac qui a dit pour les viticulteurs une messe en occitan, Marti vient chanter à la cathédrale. 
(Comités d’action viticole 1976, 170)

30 Un segond moment important es, en agost 1975, los concèrts de sosten als vinhairons que, dins Aude, foguèron matracats pels CRS e las vitras de lors veituras copadas pels meteisses CRS.

Quelque chose de profond se noue autour de ces journées : le CRAV patronne une tournée de soutien des chanteurs occitans Marti et Los de Nadau. Le produit des collectes ira au CRAV pour, annonce Marti, « rembourser les pare-brise détruits à Montredon ». Jour après jour, Marti et Los de Nadau vont chanter dans les villages du Midi viticole devant des assistances considérables. Les vignerons en profitent pour organiser des débats avec les touristes présents sur la situation de la viticulture et les problèmes que pose le tourisme à la région. Avec le recul il apparaitra que ces journées marquent une cristallisation, dans la masse des viticulteurs, de l’idée occitane. (Comités d’action viticole 1976, 186)

31Se trapa que Los de Nadau, justament, son membres o pròches de VVAP en Bearn. Se Jean Vialade parla de « cristalizacion de l’idèia occitana » en cò dels viticultors, nos sembla pasmens qu’es una afirmacion de prene amb precaucion. Qualques annadas après, dins la seguida de lors enquèstas menadas al prèp de militants occitans entre 1977 e 1980, e en particular per çò que tòca als entretens menats dins lo Lengadòc viticòla, Alain Touraine et François Dubet (Touraine et Dubet, 1981) an plan mostrat que los pichons proprietaris viticòlas lengadocians èran puslèu mesfisants cap al gauchisme dels occitanistas e que las questions culturalas qu’avián una plaça importanta dins lo discors occitanista los interessavan pas totjorn.

32Un autre public de tocar per l’occitanisme e per la NCO es lo dels obrièrs. Martí ditz pro pudicament aquesta dificultat mas Jean Vialade ne parla d’un biais plan mai clar :

En 1970, pour le PCF ou la CGT, il était quasiment un fasciste ou peu s’en faut. Et puis un jour les ouvriers d’une usine en grève l’ont appelé pour venir les soutenir. Et puis deux, et puis trois et puis dix… Il arrive à Labastide-Rouairoux : l’intersyndicale a fait une immense banderole : « Volem Viure al Pais ». Parce que, de quelque côté que l’on se tourne, on retrouve la réalité régionale : le plus fort taux de chômage, les usines qui ferment les unes après les autres, la réalité qui s’impose d’une liquidation de toutes les activités de la région, ce sont des choses qui font réfléchir. (Comités d’action viticole 1976, 233)

33Aquesta presa de consciéncia sembla de faire son camin, al mens als endreits ont venon los cantaires. Es aital a Malvesin, prèp de Narbona, ont Martí ven cantar per sosténer los obrièrs. Lo comunicat del comitat de grèva fa clarament allusion a la question occitana, quitament s’es un pauc aproximatiu :

  • 10 « Grève Malvezy – Communiqué du comité de grève », Lutte occitane, n° 5, novembre 1972.

[…] En Occitanie, où les usines sont si rares, la région sous-industrialisée, où le chômage règne, le sous-emploi, les bas salaires, les ouvriers lèvent la tête.
[…]
C’est un combat pour la justice, pour que les hommes du pays d’Occident aient le droit de vivre.
[…]
Pour que vive l’Occitanie ;
Tous unis derrière les travailleurs de la Comurhex-Malvési
.10

Los limits de l’influéncia de la NCO

34Pauc a cha pauc, doncas, e en particular mercés a la NCO, l’occitanisme fa son camin dins la societat. Mas cal benlèu pas subrestimar son impacte pregond sus aquesta societat. E vesèm, en espepissant la premsa occitanista o la premsa nacionala, que lo messatge tòca ni totas la categorias ni tot l’espaci d’òc del meteis biais.

35Aital en 1972, un occitanista bearnés escriu a Lutte occitane per faire lo punt sul desvolapament de l’occitanisme en cò sieu e en particular a prepaus d’una tentativa de faire dintrar la NCO al festenal de Siròs :

  • 11 Lutte occitane, n° 5, novembre 1972.

Chers camarades,
… le festival de Siros existe maintenant depuis 6 ans. Ce festival attire 5 à 6000 personnes, des Béarnais essentiellement et qui parlent leur langue. Chaque année cette foule assiste à un spectacle qui comprend des chants traditionnels béarnais, entrecoupés de « bonnes histoires », bien contées souvent, mais assez lourdes… l’intérêt des chants est également limité : il s’agit d’un folklore soigneusement trié et absolument neutre. On est frappé finalement par le contraste entre cette foule qui vient visiblement chercher quelque chose à Siros, et la pauvreté du spectacle qui lui est offert.
Une innovation a eu lieu cependant cette année ; les organisateurs du festival, se rendant compte eux-mêmes qu’ils ne peuvent rejeter indéfiniment le même spectacle, ont invité le samedi soir, veille du grand rassemblement, quelques jeunes chanteurs occitans (dont Estève, Toni du Larzac). Un des responsables de la revue culturelle occitane « Per Noste » a pu prononcer un plaidoyer pour la langue occitane. Mais tout cela a été fait avec le moins de publicité possible. Les spectateurs (800 à 1000) s’attendant à une classique « veillée béarnaise » ont été assez surpris et l’accueil a été mitigé. Le spectacle s’est terminé par des chansons à boire « bien béarnaises », c’est-à-dire en français, et la plupart sans doute d’origine française… fort applaudies.
Il semble que l’esprit particulariste béarnais que veulent stimuler les organisateurs ne soit pas un facteur d’accélération d’une prise de conscience occitane, au contraire…

[…]
De toute façon nous sommes très loin de la situation du mouvement occitan en Languedoc. Tant que le complexe de Lacq fonctionnera, et que le maïs (monoculture à base de plus en plus d’engrais chimique) continuera de fournir des revenus appréciables, les signes de la colonisation seront masqués.11

  • 12 « Marti e Paco fan de politica », Lutte occitane, n° 8, mars-avril 1973.

36Òm vei aicí cossí la mission d’edificacion balhada a la NCO es pas totjorn aisida e cossí depend tanben de l’estructura militanta locala e de la sensibilitat de la populacion. Se pòt aisidament imaginar qu’en Bearn, Stellio Lorenzi a pas particularament tocada la fibra occitana de la populacion e que Toni del Larzac pòrta un messatge que correspond pas a la situacion de l’agricultor o de l’obrièr bearnés. Mas, quitament en Lengadòc, vesèm que tre qu’òm quita los vilatges viticòlas, lo public es mai malaisit de captar. Après una serada organizada per Luta occitana a Montpelhièr amb Martí e Paco Ibañez, un militant fa lo constat que « si ces soirées rencontrent un impact profond, aucune structure n’est encore réalisée pour les concrétiser. C’est ainsi que les gens venus à ces soirées se perdent dans la nature du fait de l’inexistence de relais. »12 Podèm tanben pensar que la retorica occitanista pòt espaurugar l’espectator mejan vengut escotar un concèrt. Dins lo meteis article, l’autor balha una autra rason a l’eficacitat limitada d’aquestas seradas :

[…] l’on n’est pas encore capable de sortir du cadre spectacle-spectateur, alors que le but du front culturel est d’arriver à un changement de conception de l’art : d’un groupe d’élite qui détient l’art dans la conception bourgeoise, l’art doit passer à la collectivité. Et ainsi refaire de la langue d’oc le véhicule d’une libération collective.
L’action du front culturel de Lutte Occitane doit avancer les perspectives d’une révolution culturelle qui sera un des facteurs décisifs de l’évolution de l’Occitanie vers le socialisme.

37E tre qu’òm s’alunha d’un public qu’a ja una pichòta coneissença de çò que i va èsser confrontat, lo succès sembla mens fòrt se ne cresèm un compte rendut d’una universitat d’estiu de l’École émancipée dins las Lanas en 1974 :

  • 13 Herzlich Guy, « Des révolutionnaires en vacances », Le Monde, 7 août 1974.

La tolérance a failli achopper cette année sur la présence de maoïstes qui s’affirmaient « staliniens ». […] D’autres causes soulèvent moins de polémiques, comme celle de l’Occitanie, dont l’emblème à croix de Malte flotte au-dessus d’une tente. Encore que les partisans n’appartiennent pas tous au même mouvement ; le chanteur occitan Claude Marti, venu un soir à Sanguinet, a obtenu auprès des enseignants un accueil mitigé.13

38 Malgrat d’acusacions de ghettoïzacion – de la part de Joan-Pau Verdier, per exemple, tre 1973 – se pòt dire que la NCO fa pasmens un trabalh gròs d’edificacion de la societat occitana. Mas se Martí pòt dire a la fin de las annadas 1970 qu’a vendut environ 50 000 disques, la màger part dels cantaires occitans an un succès mai discret en matèria de vendas. Se podèm pas presumir de son impacte a travèrs los concèrts ont van al mai pròche del monde dins los vilatges, las MJC… e se son totjorn presents dins las lutas socialas que se debanan dins l’espaci d’òc, se pòt pausar la question de lor influéncia vertadièra fòra lo movement occitan.

39 Perque i a una causa segura, es que la NCO foguèt la granda chança del movement d’òc dins aquesta temporada. A justament permés de tocar la societat amb de mots simples que lo teoricians – mai o mens assegurats – del movement sabián pas trapar, embarrats dins una dialectica sostenguda per una retorica sovent criptica. A permés lo ligam amb lo pòble e la creacion de l’ostal de disques Ventadorn qu’a produsit Martí e la quasi totalitat de la NCO foguèt un supòrt essencial pel movement.

40 Un problèma foguèt de transformar aquel utís en mejan de sensibilizacion non solament de las massas mas tanben de las organizacions politicas e sindicalas. Vesèm plan que se faguèt sonque a la talvèra. Un autre problèma es que la musica, mai que la literatura, es tanben una question de mòda e qu’a la fin de las annadas 1970, la mòda de la protest song comença de passar. D’autant mai que la victòria de Mitterrand balha l’espèr d’una responsa a las revendicacions portadas per aquesta cançon. Un constat que fa un article del Monde en 1982 :

  • 14 Quinsat, Thierry, « La chanson occitane veut sortir du ghetto », Le Monde, 1er février 1982

« Les chanteurs occitans, déclare un jeune lycéen d’Arles, je n’y vais jamais. Sauf l’été dans les bals. Là, il y a de l’ambiance. Autrement, je m’ennuie un peu dans leurs soirées. Et puis on n’est jamais bien au courant de ce qu’ils font. »
Les chanteurs occitans ont soutenu les grévistes, les mouvements du Midi, du Larzac aux mineurs, en passant par les viticulteurs. Ils veulent sortir du ghetto régionaliste qui les étouffe et les limite. Leurs idées, à leurs yeux, sont des idées de tous les mondes qui résistent et qui refusent les colonisations culturelles et économiques. « L’Occitanie sera mondialiste ou ne sera pas », disent-ils.
« Le 10 mai nous oblige à être adultes, ajoute Jean-Marie Carlotti. Le mot « France » ne m’écorche plus les oreilles quand je l’entends dans la bouche de Mitterrand à Mexico. » Frédéric a supprimé de son répertoire une chanson contre le complexe de Fos-sur-Mer intitulée le Bâton de dynamite. Montjoie a moins de gêne à chanter des chansons d’amour. Marti ne fera plus de chansons-tracts. Il semble que le changement de pouvoir leur ait ôté des « thèmes », et qu’une nouvelle inspiration tarde à venir. En 1975, Montjoie chantait déjà : « Voici l’automne du Vieux Monde. Avise, frère, que revient l’hiver. Demain sera plus dur qu’aujourd’hui… »
Pour Frédéric, « C’est de plus en plus vrai. Mais, à nous aussi de proposer des choses, et pas seulement sur le plan culturel. Il y a le tourisme, l’emploi. Qu’est-ce que cela changerait si l’administration des P.T.T. était en Lozère plutôt qu’à Paris ? Alors, pourquoi pas ?
À nous de jouer. Gardarem lo imagination. »14

Haut de page

Bibliographie

Comités d’action viticole, 1976, La révolte du Midi, Paris, Les Presses d’aujourd’hui, coll. La France sauvage.

Marti, Claude, 1975, Homme d’oc, Paris, Dire/Stock 2.

Rouquette, Yves, 1972, La nouvelle chanson occitane, Toulouse, Privat.

Touraine, Alain et Dubet, François, 1981, Le pays contre l’État – Luttes occitanes, Paris, Seuil, coll. Sociologie permanente.

Haut de page

Notes

1 Martí, Claudi, « Lo país viu al present », Ventadorn, 1969.

2 « Consciéncia occitana », Viure, n° 5, prima de 1966, p. 1.

3 Lafont, Robèrt, « Practica de la desalienacion », Viure, n° 18-19, ivèrn de 1969, prima de 1970, p. 5.

4 Lacouture, Jean, « La célébration a réveillé une amertume en pays d’oc », Le Monde, 21 septembre 1970.

5 « Problèmas de la cançon occitana », Viure, n° 21, automna de 1970, p. 23.

6 Ibid. p. 24-25.

7 Ibid. p. 29.

8 Mourthé, Claude, « Claude Marti », Des talents et des gens, 30 septembre 1977. https://www.ina.fr/video/RBC88000052/index-video.html (consulté le 26 mars 2021)

9 « La parole à Vialade », Lutte occitane, n° 5, novembre 1972.

10 « Grève Malvezy – Communiqué du comité de grève », Lutte occitane, n° 5, novembre 1972.

11 Lutte occitane, n° 5, novembre 1972.

12 « Marti e Paco fan de politica », Lutte occitane, n° 8, mars-avril 1973.

13 Herzlich Guy, « Des révolutionnaires en vacances », Le Monde, 7 août 1974.

14 Quinsat, Thierry, « La chanson occitane veut sortir du ghetto », Le Monde, 1er février 1982

Haut de page

Pour citer cet article

Référence électronique

Yan Lespoux, « La nòva cançon occitana e la societat miègjornala »Lengas [En ligne], 90 | 2021, mis en ligne le 08 juin 2022, consulté le 18 janvier 2026. URL : http://journals.openedition.org/lengas/5854 ; DOI : https://doi.org/10.4000/lengas.5854

Haut de page

Droits d’auteur

CC-BY-NC-ND-4.0

Le texte seul est utilisable sous licence CC BY-NC-ND 4.0. Les autres éléments (illustrations, fichiers annexes importés) sont susceptibles d’être soumis à des autorisations d’usage spécifiques.

Haut de page
Rechercher dans OpenEdition Search

Vous allez être redirigé vers OpenEdition Search