Navigation – Plan du site

AccueilNumérosTome CXX N°2Leon Còrdas / Léon Cordes, « Can...Leon Còrdas, « romancièr testimòni »

Leon Còrdas / Léon Cordes, « Canti per los qu'an perdu la cançon »

Leon Còrdas, « romancièr testimòni »

Claire Torreilles
p. 353-378

Texte intégral

Mercegi fòrça per lor ajuda bibliografica Aurelian Bertrand, responsable dels archius al CIRDOC, e Maria-Joana Verny.

1Coma poèta e coma òme de teatre Leon Còrdas se fa conéisser jove dins lo mond de la cultura d’òc. Coma prosator, publica mai tard e dins una pontannada de uèch ans, de 1974 a 1982, dos romans e dos recuèlhs de novèlas, siá :

  • Los Macarèls I, 1974, Toulouse, IEO, coll. A Tots.

  • Sèt pans, 1977, Toulouse, IEO, coll. A Tots.

  • La batalha dels teules, 1979, Montpellier, Les presses du Languedoc, coll. Espandi occitan.

  • Los Macarèls II, (La Beguda de Joannes), 1982, Toulouse, IEO, coll. A Tots.

2La cronologia de la publicacion seguís pas la de l’escritura. Còrdas o ditz tre la primièra linha del prefaci de Sèt pans : es « un roman que pareis mai de 25 ans après èsser estat escrit ».

  • 1 Réédition des chroniques littéraires publiées par Yves Rouquette dans La Dépêche de 1974 à 1982, En (...)
  • 2 « ‘A tots’, dix ouvrages en prose, un pari déjà gagné, une aventure à soutenir de toute force », op (...)
  • 3 Sul roman « La Route des Gueux », veire infra. Robèrt Lafont ditz, dins l’ome-natge que li fa en 19 (...)

3Remarcam que tres dels quatre libres son publicats dins la colleccion A Tots de l’IEO, çò que sembla normal estent l’òbra ja publicada e l’implicacion activa de Leon Còrdas dins l’institut. Mai qu’aquò, dins aquelas annadas 1970, fa partida dels « caps de colleccion ». En 1974, A Tots, bailejat per Joan Larzac, a pas qu’un an de vida. Ives Roqueta dins sa cronica de La Depêche1 de 14 de mai 19742 parla de l’òbra de prosator de Còrdas, « un de nos écrivains importants et injustement oubliés ». Ditz qu’a legit d’el en manuscrit dos romans, l’un sus 19073, l’autre sus la mecanizacion, e que son d’òbras fòrtas que se doblidan pas aisidament. E un mes aprèp, 15 juin 1974, lança una soscripcion per sosténer A Tots e anóncia los titols novèls : La Quimèra de Bodon, Tu culpa de Lafont, Bogres d’ases de Serre et Los Macarèls de Còrdas. Polida plega mas Los Macarèls es pas un dels romans evocats per Ives Roqueta, es un recuèlh de sèt novèlas. Del títol provocaire e que serà reïterat, Còrdas dona l’explica dins la primièra novèla : « Letra per F.-Peter Kirsch ». L’agach exterior del jove estudiant austrian vengut en cò sieu lo fa s’interrogar sus se e sus son mond. Aprèp l’escambi intellectual, la galejada filosofica : « Sètz de paganasses vosautres, macarèls de mediterranencs. Mas Jèsus-Crist èra pas del Nòrd ! ». A Leon, la paraula li conven per dire los sieus, los Occitans, los pacans, lo papeta Còrdas, lo Joan de Còrdas, lo Jepet que se pengèt a la figuièra, lo CRS despatriat, e totas las figuras que farà viure dins sas pròsas.

  • 4 Dins Oc, n° 251, automne 1975, Max Allier saluda Leon Còrdas comme un vertadièr « òme d’òc » e non (...)

4Òm pòt pensar que lo succès dels Macarèls4 endralhèt la publi-cacion tres ans aprèp del roman « sus la mecanizacion », Sèt pans, escrich a la debuta de las annadas cinquanta qu’Ives Roqueta n’aviá legit lo manuscrit e que prenguèt reng en 1977 dins la colleccion A Tots, entre Pèire Bec (Contes de l’Unic) e Joan Larzac (Descolonisar l’istòria occitana).

Portar testimòni

  • 5 « Le devoir de l’écrivain est de témoigner de son époque, pour son époque. »
  • 6 Tèrra d’òc, la revista de la Sociétat d’Éstudis Occitans dirigida per A.-J. Boussac e publicada de (...)
  • 7 Còrdas ten la rubrica « Cronica del teatre d’òc » de Tèrra d’òc.
  • 8 « Dins la boca del pòble d’òc » es lo títol de la rubrica tenguda per Max Roqueta dins Tèrra d’òc ( (...)
  • 9 Leon Còrdas : « Ja avem d’escrivans que comptan, avem qualques romans, avem de poetas qu’an trobat (...)
  • 10 A.-J. Boussac. Bonas paginas de La Fabrica in Òc, oct., nov. dec. 1941, supplément à Tèrra d’òc, n° (...)
  • 11 Tèrra d’òc, n° 52, abril 1944, estudi sus Batisto Bonnet de Jóusé Loubet.
  • 12 Paul Eyssavel revira Longus (Dafnis e Cloe) Oc, genier, febrier març 1941, supplément au numéro 41 (...)
  • 13 Tèrra d’òc, n° 45, setembre 1943, La cançoun perdudo, counte per Charle Galtier.
  • 14 « Lo barrullaire », Tèrra d’òc, n° 10, oct 1940.
  • 15 « Fangas e fum », novèla de Leon Còrdas, Tèrra d’òc, n° 3, març de 1940. Lo tèxt es citat en annèxe (...)
  • 16 Un « capèl » de la redaccion en naut de pagina ditz : « Amb aqueste numèro començàm la publicación (...)

5Cossí Leon Còrdas qu’es un autor e un actor dels mai conscients de l’occitanisme se plaça dins lo desvolopament de la pròsa occitana de la segonda part del sègle XX ? Manca pas de s’exprimir sus la situacion de l’escrivan e sus sa responsabilitat particulara dins la formacion de la consciéncia occitana. Dins La batalha dels teules, escriu : « Lo deure de l’escrivan es de portar testimòni sus son temps, per son temps5 » (p. 73). Es una posicion presa dempuèi longtemps. Dins Tèrra d’òc6, tre 1940, la question de relacion de la lenga al pòble es pausada de contunh : prendre la lenga al pòble e la li tornar de tal biais que la conesca sieuna. Tant Andriu-J. Boussac coma Max Roqueta, coma Ernest Vieu o Leon Còrdas tenon de cronicas que trachan d’aquò : lo biais de far un teatre popular e de lo far viure7, d’escriure una pròsa de qualitat posada « dins la boca del pòble8 », de l’editar, vulgarizar e difusir per anar « a la conquista del public9 ». Se, dins Tèrra d’òc, los modèls del roman son Enric Mouly, A.-J. Boussac10 e Batisto Bonnet11, lo trabalh de la pròsa se cultiva tanben dins l’exercici de la traduccion12, de la novèla dins lo biais de Galtier13, Camproux14 o Roqueta. Còrdas publica sa primièra novèla, Fangas e fum15, dins lo numèro 10 ont la redaccion aficha sa volontat d’encoratjar la recèrca « d’una dralha nòva » per las « obras d’imaginacion16 ». Çò novèl es benlèu aquí un biais familiar, un ton de convèrsa qu’es ja la marca de l’estil de Còrdas, per dire la vida vidanta d’un jove soldat, Pèire Mamet, un « rapelat, coma los autres » cantonat dins un vilatge evacuat d’Alsàcia ont sa companhiá pren sos quartièrs d’ivèrn. Lo sol eveniment es la recepcion d’una letra de rompedura que lo nafra tant que se met tot en un còp a fumar e a escriure :

  • 17 « Il se mit à écrire d’une main nerveuse, au crayon, sur une feuille arrachée à un cahier volé dans (...)

« se botèt a escriure d’una man nervilhosa, al craion, sus un fulh arrancat a un cadern raubat dins una escòla ont avián cantonat. Quand siaguèt temps de s’anar jaire dins la palha trepejada, escriviá totjorn17. »

6Amb lo detalh verista del « megot atudat e marrit, empegat a sos pots… », es la postura de l’escrivan !

  • 18 « Respelida », Tèrra d’òc, n° 4, dec. 1940. Lo tèxt es citat en annèxe II.

7Una autra novèla, Respelida18, es publicada dins lo numèro seguent de Tèrra d’òc. I tornam trobar lo personatge de Pèire Mamet, liberat, tornat a sas vinhas, apasimat de la

  • 19 « apaisé par la patrie retrouvée, par sa terre, son soleil, par une langue sonore héritage de perso (...)

« patria retrobada, de sa tèrra, son solelh, una lenga tindaira eiretatge de personalitat, de cultura, d’umanitat, de libertat e de franquisa19

8Novèlas ineditas de l’an quaranta, nascudas de l’ànsia de l’exili e de l’esper del retorn.

  • 20 Robèrt Lafont, « Per una pròsa d’oc », Occitania, n° 7, novembre de 1948. « Pour préparer et aider (...)
  • 21 Charles Camproux, « Una anja », Occitania, n° 9, fev. març 1949.
  • 22 Max Roqueta, « Font del Fabre », « Catarina », Occitania, n° 7, oc-nov. 1948.
  • 23 Paul Eyssavel, « Lo cavau », Occitania, n° 2, fev.-març 1948 ; « Trimareu», Occitania, n° 5, julhet (...)
  • 24 Pèire Lagarde, « Jorns d’automne », L’ase negre, n° 13, nov. 1947 ; « A s’amagar » Occitania, n° 3, (...)
  • 25 Robèrt Lafont, « La votz », L’ase negre, n° 11, julh. agost. 1947 ; « Joan Larsinhac », Occitania, (...)
  • 26 Jaume Vidal, « Lo banh », L’ase negre, n° 14, dec. 1947.
  • 27 Francés Rei-Belenc, « L’Auriòl », dedicat « al Mèstre Loís Alibert », Occitania, n° 5, julhet de 19 (...)
  • 28 Leon Còrdas, « La corrida », Occitania, n° 1, genier de 1948.
  • 29 « Une scène de vie languedocienne, avec sa brutalité, ses couleurs tranchantes et son sang bouillan (...)
  • 30 « Espanhòl d’aquí » es una pèça de Michel Cordes, filh de Leon, que tracha de la vida d’una familha (...)

9Lo desir de modernizacion de la pròsa afichat per Tèrra d’Oc es tanben la tòca de las revistas seguentas editadas aprèp la guèrra, L’Ase Negre que Còrdas n’es co-fondator amb Elena Cabanes e Robèrt Lafont, puèi Occitania en genièr 1948. Lo director Robèrt Lafont signa un apèl a « aparar e ajudar l’espelida d’una vertadièra pròsa occitana originala e mai digna d’èsser comparada a las autras pròsas modèrnas20 ». La revista presenta una causida bèla de pròsas de Camproux21, Roqueta22, Eyssavel23 e de novèls venguts coma Pèire Lagarda24, Robèrt Lafont25, Jaume Vidal26, Francés Rei-Belenc27… Còrdas dona en genièr de 1948 una novèla de tonalitat tragica, « La corrida28 », que ditz inspirada d’un « fait divers » e que presenta coma « una scèna de vida lengadociana, amb son gost brutal, sas colors que se trucan e son sang que rebolís29. » Es l’istòria de Pascal Belaiga, un gavach « roge, fort, pansut, las gautas li amagant lis uelhs tant era conflat de grais » que, fortuna facha, s’installa borgesament dins un vilatge de la plana ont senhoreja. Amator de corrida de buòus a l’espanhòla, se mòstra entreprenent amb la femna de Pepe, un « Espanhòl d’aquí30 » que va metre en scèna una venjança tauromaquica.

  • 31 Aquelas expressions son trachas del prefaci de Sèt pans. (1977)
  • 32 Dins L’Ase Negre del 8 d’abrial de 1947, Enric Espieux signa un article bèl sus « Farrebique, primi (...)
  • 33 Entre novembre 1984 e genièr 1985, un escambi de letras entre Leon Còrdas e Jean Sagnes trachan de (...)
  • 34 « Maridat, e ma femna foguent de Montolièrs, a 3 km d’Argelièrs, que son papeta èra estat dels « 87 (...)
  • 35 « Aquò’s atal que dintrèri, cap a 1947, en relacion dirècta amb Philippe Lamour. Lamour, èra an aqu (...)
  • 36 Lo deputat comunista Raol Calàs aviá legit « amb grand gaug » lo manuscrit per los EFR, e propausav (...)
  • 37 « Mas d’aquel moment me batiái, ieu, après aver quitat lo Menerbés – vengut jardinièr a Lattes – am (...)
  • 38 La Route des Gueux es per paréisser (Christian Salès, groupe Oc).

10Es la « realitat sociala », la realitat « fangosa e rocassièra » del « pòble de las vinhas31 » que Còrdes vòl retraire dins aquelas annadas 1947-48, tant al teatre coma dins la cèrca d’una pròsa eficaça o encara dins l’expression cinematografica que lo succès de Farrebique32 de Jòrdi Rouquier ven de revelar. Còrdas rescontra lo realisator a Paris, coma o ditz dins una letra a Jean Sagnes33, dins lo temps qu’es a escriure Sèt pans, e aquò li dona l’idèa d’un film « totòc », bastit coma Farrebique e « ont dintrarià lo cicle d’una vendémia a l’autra, d’un an de cultura de la vinha » que lo roman ne seriá coma lo scenari. Parallèlament, escriu lo scenari de La Route des gueux, un film suls eveniments de 1907 que n’aguèt de testimonis pròches dins sa tropa e dins sa familha34, mas que capitarà pas de far realizar, per de rasons financièras mai que mai. Lo scenari se muda en roman, escrich « del meme moment dins la mema encra vèrda que Sèt pans » mas en francés, cossí que siá, per dire d’ajudar eventualament lo film e tocar un public mai larg, seguissent los conselhs de sos sostens politics de l’epòca e d’en primièr de Philippe Lamour35. Malgrat la causida de lenga, la publicacion d’aquel roman se faguèt pas dins l’encastre de l’edicion francesa de las annadas 195036 que per Leon corres-pondon als auvaris de la « vida vidanta materiala e del crèba-còr que se’n seguís37 ». En 1985, una temptativa novèla per editar lo manuscrit als Éditeurs français réunis capitèt pas nimai38.

  • 39 Òc, abril 1951, La Vespa, p. 15-20.
  • 40 Ives Roqueta rapòrta aquela paraula de Leon Còrdas : « En 1946, quand je travaillais à Sèt Pans que (...)

11En abril 1951, Còrdas publiquèt dins Òc una novèla titolada La Vespa39 qu’èra, amb qualques modificacions de detalh, lo primièr capítol de Sèt Pans40.

  • 41 Oc, n° 170, octòbre de 1948, Robèrt Lafont, « Per una pròsa occitana », p. 30-32.
  • 42 L’occitan fondamental, Apreni lèu-lèu l’occitan, IEO, nd. 48 p.
  • 43 Oc, n° 174, octòbre de 1949, « Condicions de la pròsa d’òc » « Est la conscience du peuple. Il tien (...)

12En octòbre de 1949, intervenguèt dins lo debat menat dins Òc sus la pròsa d’òc41, en coeréncia amb sas cronicas de Tèrra d’oc pendent la guèrra, per explicar que la dificultat mai granda de la pròsa èra de trobar son public, un public que devián formar a la lectura de sa lenga. E es dins aquesta amira que Còrdas publicarà una iniciacion a l’occitan fondamental42. L’escrivan d’òc, çò ditz en 1949, « es la consciéncia del pòble. Ten d’el lo melhor de son eime, n’es emprenhat e inspirat43 ». Son de paraulas que legissèm dins de formas gaire diferentas dins Oc de la debuta de las annadas 1950, jos las plumas de Castan, Roqueta, Allier o Lafont. Per Còrdas, la fidelitat al pòble permet tanben de pausar la question dels contenguts del roman. Lo public vòl una pròsa ont se sentisca viure :

  • 44 « Une prose où éclatent son rire et ses pleurs amers, où se reflètent sa vie quotidienne, son espri (...)

« Una pròsa ont tinda son rire e amargan sos plors, ont se miralhan sa vida vidanta, son eime e son astrada, tot çò que lo peltira o lo sarpotís, lo maca o li dona joïna44… »

13Es aquò per el la dimension d’universalitat, perqué es tot simplament l’uman.

  • 45 Emili Barthe (1874-1939), nascut a Nissa (Nissan-lez-Ensérune), visquèt a Besièrs e escriguèt sens (...)
  • 46 La Nissanenco, rouman de la Terro d’Oc, Béziers, Ediciu de las pajos d’Oc, 1938, 310 p. La Nissanen (...)
  • 47 « Sèt Pans de Léon Còrdas, Néo-réalisme pas mort. Lettre suit ». « Je ne souhaite qu’une chose de t (...)
  • 48 « Il faut sept pains pour passer la semaine, un chaque jour, et c’est le dernier qui est le plus du (...)
  • 49 Émile Barthe, Los profitaires, Béziers, impr. du Midi, 1922.

14Sèt pans se situa dins aquela perspectiva de cultura populara reïvindicada. E se sent la marca, l’influéncia de l’escrivan que foguèt per el lo mèstre en matèria de cultura populara d’oc, lo felibre besierenc e autor de teatre famós45, Emili Barthe. I a de semblanças entre Sèt pans e lo roman que Barthe escriguèt en 1938, La Nissanenco46. La plaça del vilatge viticòl, ostals sarrats e vinhas a l’entorn, la figura centrala feminina de femna valenta : Floureto e Manuèla, las scènas de vendémias amb caponadas, abelhas, sèrps e amors clandestinas. Mas Còrdas cèrca d’escafar lo patòs e la bonomia convenguda que marcan lo roman terradorenc de Barta – e que ne trobam encara de ressons dins una pròsa coma Respelida – en afustant un estil mai realista de pintura de la societat rurala en crisi, un biais qu’Ives Roqueta qualifica de « neo-realisme » en referéncia al cinèma italian47. Verai que lo ton es, coma dins las darrièras pèças de Barthe d’alhors, negre, pesuc. Lo títol de Sèt Pans ven de la mena de parabòla que conta un dels personatges per explicar al gròs vinhairon e al jove curat çò que significa « lo pan de cada jorn » : son paire arroïnat per la filloxèra derrabèt sas vinhas e se loguèt en cò d’un patron. Cada jorn en tornant portava lo pan a la familha e lo dissabte ne portava dos en disent : « Cal sèt pans per passar la setmana, un per cada jorn, e lo darrièr es lo que mai còsta de pagar48. » Aquí es pas mai la filloxèra, es la secaresa puèi la granissa qu’o venon tot arroïnar, e mai los que se revòltan e cèrcan lo mejan de se’n tirar, coma lo jove Marcon que s’es crompat un tractor, primièr del vilatge, mas que se crèba al trabalh. Leon Còrdas sap de qué parla, es son istòria. Aquela crisi l’a viscuda e justament ne pòt testimoniar. Sens dolorisme, mas revoltat per l’injustícia sociala : la crisi a, coma disiá Barthe, sos « profitaires49 » que son los rics proprietaris.

  • 50 Jean-Marie Auzias, « Une vitrine de l’occitan : la collection ‘A tots’ de l’Institut d’Études Occit (...)

15Joan-Maria Auzias qu’analisa la collection A Tots dins un article bèl d’Europe de 198550 fa una plaça particulara a Sèt Pans.

  • 51 Europe, p. 44. Emile Guillaumin, 1873-1951, Ygrande (Allier), es un escrivan-pagés, sindicalista ag (...)

« Un ouvrage clé […] et qui fut édité trop tard pour apparaître comme l’annonce d’un renouvellement de la sensibilité sociale et littéraire occitanes. Cela préfigurait les tendances actuelles de l’IEO, une sorte de radicalisme chrétien jamais explicité, mais réagissant dès qu’on pose les problèmes en termes de politique et de lutte des classes. A Tots continue surtout la tradition des écrivains populaires comme, en France, Émile Guillaumin51 ».

16E, dins la vena ruralista, a costat del roman païsan de Còrdas, Auzias cita la Margalida del bearnés Gastellut-Sabatot que legís amb tant de plaser, çò ditz, coma las òbras del provençal Charles Galtier.

17Còrdas, militant occitan en primièra linha, a degut sentir la discordança entre son roman païsan, malgrat l’inspiracion libertària, e l’actualitat del moviment occitan de la fin de las annadas 1970. Segon Ives Roqueta, que ne parla a l’irreal del passat, aquel roman manquèt sa vocacion per èsser vengut tròp tard sul mercat de la literatura occitana.

  • 52 Connaissance du pays d’oc, op. cit., 1986, p. 53.

« Édité à son heure, Sèt Pans aurait sans doute changé toute la donne de la prose en langue d’oc. Il l’aurait libérée à la fois d’un intellectualisme de référence et de la magie quelque peu morbide du poème en prose. Il lui aurait surtout ouvert les voies de la réalité, celle des machines et des conflits sociaux. Par la vigueur de son scénario, la sûreté du découpage dramatique, le recours constant à une psychologie du comportement et à un imaginaire concret, absolument contemporain, ce roman du jeune homme au tracteur aurait été, sans aucune espèce de doute, l’œuvre de référence de toute une génération, celle qui précéda la venue à l’écriture de Joan Bodon52. »

  • 53 E mai diguèsse, a prepaus de las secadas e de las geladas de l’après-guèrra que lo vilatge ne patig (...)
  • 54 Lo vilatge quilhat es de segur Menèrba, evocat tre la primièra novèla : « Menèrba, lòc naut e nau d (...)
  • 55 « Daniel […] èra un dròlle de 68. De la revelacion de 68 : coma un aigat que fa petar totas las res (...)
  • 56 Dins Gai Saber n° 382 d’abril 1976, p. 35, Ernest Negre saluda, dins sa recension de l’obratge, la (...)
  • 57 « S’aquò vos enfècta, podètz passar un capitol enlà ! » (Si ça vous ennuie, vous pouvez passer au c (...)
  • 58 « au premier coup d’œil est informe, ne tient pas debout. »

18Qué que foguèsse lo retard – e benlèu perque l’ensenhament es totjorn un pauc en retard sus la creacion – pòdi testimoniar qu’aquel roman foguèt plan presat dels ensenhaires e escolans d’occitan en Lengadòc, a un moment, dins las annadas 1970, ont l’ensenhament coneguèt una pojada espectaclosa. La qualitat de la lenga, l’interès dramatic, l’encastre vilatgés amb un reire-plan de viticultura en crisi èran los elements d’un best-seller pedagogic (de longa vida !). E me sembla que La batalha dels teules venguèt coma una represa en forma d’actualizacion de Sèt pans53. Avèm lo vilatge, tot parièr, quilhat sus son sèrre al mitan de las vinhas54, e sa micro-societat. Lo nom càmbia, de tot biais es un nom fictiu, Vilapinha. Lo tèma se desplaça : se tracha de la segondarizacion dels ostals en seguida de la despopulacion rurala e dels cambia-ments que se fan dins las mentalitats. A costat del vilatge vièlh, i a lo vilatge nòu, dins la plana, e un camping. L’istòria es la dels teules d’una jaça mai o mens raubats per de mond que ne vòlon cobrir sa residéncia secondària. Los joves menan l’accion, coma dins Sèt pans, mas amb l’audàcia de 6855, a l’entorn d’un personatge « testimòni » se poiriá dire, un vièlh occitanofòn monolingue vengut de la montanha e que s’apèla Ranquet. Personatge un pauc folclorizat coma lo « 19 sòus » de Sèt pans, mas coma el, finalament, eròi « positiu »56. Çò novèl es que lo roman se dobrís a doas causas : las allusions (nombrosas) a la creacion occitana e las (tan nombrosas) intervencions del narrator, segon una mena de libertat que ven saique de l’escritura de las novèlas, o mai largament de l’esperit del temps ! Libertat d’inserir de citacions de poètas e cantaires contemporanèus e amics, coma Miquèl Decòr, Ives Roqueta, Patric, Mans de Breish… Libertat d’inserir de comentaris e de dissertacions en forma de digressions assumidas57 suls tèmas de l’occitanisme ambient : d’un costat la reconquista de la lenga, l’eslogan de Volèm viure al país bombardat dins la nuèch (p. 20), « la granda perspectiva populara del 29 d’abril de 1976 » (p. 72), e d’un autre costat la denóncia de la « toristificacion » del país, de l’alienacion culturala, del « racisme » franchimand incarnat per Taine (p. 97). Libertat enfin de metre al centre de la diegèsi una representacion del Teatre de la Carrièra : sus la plaça del vilatge ont avián ja jogat Mòrt e resureccion de Monsur Occitania i venon tornarmai, en fin de vendémias, per jogar Bogre de Carnaval. Aquí que lo teatre se tròba al centre geografic e simbolic del roman, e que « l’autor de la vièlha gene-racion » un còp de mai pren la paraula a la primièra persona per dire son si sus un teatre qu’es pas sieu e que « del primièr còp d’uèlh es infòrm, destrantalhat58 » mas que lo conois plan e ne passa en revista e lo repertòri e las tecnicas e l’engatjament vertadièr (p. 78).

19Còrdas se maina plan que son roman de còps regiscla de subjectivitat e se n’excusa :

  • 59 « Comment pourrais-tu, toi, être objectif ? Quand tu te rends compte qu’à travers une prise de cons (...)

Cossi podriás, tu, èsser objectiu ? Quand t’avisas qu’a travers una presa de consciéncia que t’aparten pas sol, la mendre anecdòta revèrta lo roman d’un pòble, d’un païs59.

Roman d’un pòble, paraula d’un païs

  • 60 La polemica visa pas Còrdas personalament mas la politica editoriala de l’IEO de las annadas 80 : « (...)
  • 61 Jorn n° 11, 1984, p. 75-76.

20Sèt pans èra mai que mai lo roman del pòble, La batalha dels teules es puslèu lo roman d’un pòble. Lo resquilhament del sens social al sens etnic èra ja contengut dins la soscadissa de l’article d’Oc de 1949. Joan-Ives Casanova lo vei tanben dins Los Macarèls II (1982) que ne fa una recension puslèu polemica60 dins Jorn61 :

  • 62 « Finalement de quoi est-il question dans Los Macarèls II ? Le premier chapitre nous l’indique : le (...)

« Finalament de qu’es question dins Los Macarèls II ? Lo primier capitol nos l’indica […] : lo païs, eternament lo païs, amb sa lenga e sa civilizacion que morís…62 »

21Sul plan estetic tocam, çò ditz, los limits del genre del testimo-niatge romanesc, entre « etnotext-testimòni » e creacion literària :

  • 63 « Los Macarèls est bâti sur un mythe. Sur le mythe de la littérature occitane, une certaine littéra (...)

« Los Macarels es bastit sus un mite. Sus lo mite de literatura occitana, una certa literatura que si vòu paraula per son païs, que si vòu l’aparar, lo protegir63 ».

22Lo roman occitanista seriá en dangièr de passar de mòda plan mai que lo roman païsan. Mas es plan malaisit de categorizar una escritura que fugís volontàriament la categorizacion, que se chala de passar d’un narrator a un autre, d’un temps a l’autre e d’un genre a l’autre, segon la vida de la paraula :

  • 64 « Car mes récits sont d’abord faits de vie commune. Le pays commence par le voisinage… On y est tém (...)

« Car mos racontes son faits d’abòrd de vida comuna. Lo païs comença pel vesinat… I siás testimòni ambe tas mans tanplan coma per la paraula : paraula, lenha, fogal, los mots de la lenga i son presents coma los bastets a las mans64. »

  • 65 L. M. I, p. 91-112.
  • 66 L. M. II, p. 75-93.
  • 67 « La vie que l’on supporte et qui se déroule comme un conte cruel. » L. M. II, p. 93.

23Los dos libres dels Macarèls utilizan la forma brèva de la novèla per testimoniar divèrsament de la diversitat de las situa-cions e dels tipes umans dins la societat actuala. Los personatges son ancorats dins la modernitat, o tot al mens l’urbanitat, coma dins « La manifestacion »65 que mòstra una manifestacion de viticultors a Montpelhièr del punt de vista d’un CRS vengut de París que se soven que foguèt jove trabalhador de la vinha, o coma dins « L’acordeon »66 centrat sus la personalitat estrifada d’un obrièr acordeonista que sa vida s’embarra dins l’ambicion pichòta-borgesa de sa femna (al revèrs de mai d’una situacion de l’univèrs de Còrdas ont es la femna que pòrta l’òme). La conclusion d’aqueles racontes del cotidian amar es que repre-sentan « la vida suportada, debanada coma un conte crudèl »67. Tota istòria viscuda tròba paradoxalament son expression dins la veritat prigonda del conte.

  • 68 L. M. II, p. 57-74.
  • 69 L. M. II, p. 49-56.
  • 70 L. M. I, p. 39-46.
  • 71 L. M. I, p. 47-52.
  • 72 L. M. II, p. 101-130.

24Aital la màger part de las istòrias relèva del repertòri popular que Còrdas contaire ne mestreja totes los còdis e registres : « Metempsicòsi »68, « Nadal dels quatre camins »69, « L’arpentaire »70, « L’ombra de la figuièra »71 e tanben « La beguda de Johannes »72 (la beguda, luòc de contaralhas sens fin). Còrdas non solament amaga pas aquela sorsa del folclòr mas al contrari la cita coma son inspiracion tant intima coma collectiva, coma lo ressòrt primièr de son escritura.

  • 73 Lo primièr, lo tornèri dire tot còp a l’anar de mas corridas de contaire […] Atal lo dirai un còp d (...)
  • 74 « Des spécialistes travaillaient, faisaient des recherches, et les poètes s’en faisaient l’écho. » (...)
  • 75 Còrdas cita sens ne donar ni l’autor ni lo títol qualques vèrses del poèma de Saurat paregut en 195 (...)

25Per exemple, dins « Metempsicòsi », cresenças popularas e fablas literàrias se crosan sul tèma de L’ase d’aur. I a tres nivèls. Lo primièr qu’es plan conegut del contaire de vilatge73 es lo del conte faceciós de l’ase raubat a un paure òme que los raubaires li fan creire qu’èra un evesque mudat en ase e al cap de sèt ans desliurat de sa preson de carn. Lo second es l’istòria fantastica de Cabassut, un vilatgés que sap que lo caval de son vesin es un evesque e que li parla coma se deu a un pecador… fins a la reguitnada mortala. Enfin i a lo nivèl literari de çò que presenta coma lo reviscòl dels estudis catars : « D’especialistas furgavan, butavan la cèrca, e los poètas i fasián resson74 » en donant en seguida la citacion sens referéncia d’un passatge sus la metempsicòsi d’Encaminament catar de Denis Saurat75. La novèla, facha de l’imbricacion coma improvisada del tres nivèls desparièrs e de qualques digressions politico-filosoficas de las voses crosadas, laissa una impression de desordenat e d’inacabat que retipa una convèrsa de fial en cordura.

  • 76 L. M. I, p. 19-38.

26Lo narrator se pintra sovent en situacion de contaire o d’esco-taire, coma fa dins « Joan de Còrdas »76 que retrai un vailet estacat a la familha dels Còrdas, un « pauc parla » mas qu’amb lo narrator contava e contava que siá d’Aquilles Mir, de Daudet o de Rabelais o del jornal del jorn, sens arrestar, que tot çò que legissiá o sabiá de tèsta, per lo quite plaser de dire, de contar :

  • 77 « La parole était notre espace, elle nous gonflait la bouche, nous donnait le souffle, faisait mont (...)

« La paraula èra nòstre espaci, nos pastava las maissas, nos donava l’alen, fasiá nauta coma de Pirenèus, al cap de las vinhas, al cap del vent, la barra orizontala de la Sèrra d’Opià77. »

  • 78 « M’èri afrairat amb los estudiants del Novèl Lengadòc. Ligant amb Max Roqueta lo sòmi d’un matin d (...)

27Del mestièr de contaire, l’escritura tira son ritme e son expressivitat e del mestièr teatral son sens del dialòg. Còrdas sap, coma Max Roqueta que lo coneguèt e legiguèt d’ora78, lo poder de las paraulas. Dins « L’arpentaire » dos rivals se cèrcan, s’insolentan :

  • 79 « Tout à coup il jetait son chapeau à terre. À ses pieds :Si tu sautes par-dessus ce chapeau, tu (...)

« Tot d’una getava son capèl al sòl. Davant sos pès : “Se sautas aquel capèl siás un òme mòrt !”
E se reculèt d’un pas.
Pacha d’òme ! Sautar pas lo capèl ? Tè ! sautat èra…
La lama se plantèt dins son ventre de bas en cima. Coma una relha bauja dobriguèt una laurada sagnosa79. »

  • 80 L. M. II, p. 25-47.
  • 81 « Pro per un rafi », « Ma vie, avait-il dit, on en ferait un roman… » L. M. II, p. 30.

28Dins « Pro per un rafi »80, Còrdas se ten dins un equilibri sabent entre conte e novèla, entre la tipizacion e l’individua-lizacion del retrach que fa d’un vesin sieu, Bertrand. Aquel Bertrand es un pauc coma lo Ranquet de La batalha dels teules, brave, silentós – sovent per necessitat perqué lo francés li es lenga mòrta e mai siá vendeire de lach a Montpelhièr. Li fa contar sa vida, per un còp qu’es realista qu’un personatge narrator parlèsse occitan : « Ma vida, aviá agut dit, se’n fariá un roman81… »..E lo raconte se debana, amb lo buf e las pausas necessàris, sul tèma de la misèria dels paures, dels umiliats e ofensats de la societat païsana tradicionala :

  • 82 « Et le voilà perdu derrière ses brebis par monts et par vaux. Le premier jour, avant de partir, il (...)

« Gara l’aquí deslargat darrièr las fedas per causses e morrèls. Lo primièr jorn, abans de partir, li donèron una manada de castanhas. Pensatz se las aguèt lèu engolidas aquelas castanhas82… »

  • 83 « Celui qui assassina le président Sadi Carnot à Lyon le 24 juin 1894 ! » L. M. II, p. 38.
  • 84 Charles-Louis Philippe, Chroniques du canard sauvage, Paris, Gallimard, 1923. Citat per Michel Rago (...)
  • 85 La longa nòta de Còrdas sus Caserio (L. M. II, p. 40-42) punta la veritat istorica del personatge e (...)

29E mai, dins las « istòrias de brigand » que conta Bertrand, i a la de Caserio « lo qu’escotelèt lo President Sadi Carnòt a Lion lo 24 de junh de 189483 ! ». Aquel Caserio que Bertrand l’auriá agut coma companh de còla per las sègas representa una mena d’eròi arnarquista. Lo passatge fa pensar a l’elògi que ne fa Charles-Louis Philippe dins sas Chroniques du canard sauvage84. Dins la novèla de Còrdes, las figuras de Bertrand e de Caserio se superpausan coma de figuras emblematicas de la revòlta proletariana85.

30Çò que pòt raprochar Còrdes dels melhors autors del roman rural coma Léon Cladel, Baptiste Bonnet, Eugène Le Roy, Émile Guillaumin o d’autors de literatura proletariana coma Charles-Louis Philippe, Henri Poulaille o Louis Guilloux, es un biais de parlar del pòble, pròche e juste, sens emfasi ni aproximacion. Per dire la misèria, per dire lo patiment, los gèstes e las paraulas del trabalh. Lo podaire, lo vendemiaire, lo sulfataire, sovent en còlas, en qualques linhas son presents, mas tanben lo lauraire, l’arpentaire (e mai fals !), lo pastre, lo maçon, lo faure. Mas per èsser tecnica, amb los mots que cal coma cal, la descripcion es jamai seca, se carga de tendresa o de sentiment de fraternitat o de colèra partejada. De còps, se fa vision a la Giono, coma dins La Batalha dels teules, quand « los del mestièr » tòrnan cobrir lo teulat de la jaça del Ranquet :

  • 86 « Ainsi, comme il se doit, on posa d’abord les quatre premières rangées de tuile, à reculons, en co (...)

« Atal coma se deu, pausadas dins d’abòrd las quatre primièras rengas de teules, de reculons, en començant al ran de la paret e cap amont. Puèi tornar autras quatre. Un autre òme entendut aladonc prenguèt la seguida tanlèu aquela sisa avançada, puèi un autre, puèi un autre pariu, tal coma se seguisson de segaires dins un camp, de dalhaires dins un prat, de reng en reng, alinhats en galís que camina d’arreu. La teulada, a son anar, tornava renguejar a bèlas presas coma sègas, coma prat dalhat, coma tèrra laurada sas regas plan afustadas que s’alinhan sul talh86. »

31Quand ditz que l’escrivan deu portar testimòni de son temps, Còrdas o pren al sens mai larg : de tot son temps, memòria e actualitat, vida populara e vida literària ensemble amb sos actors, sos escambis, sas perspectivas. Testimònia dins sas pròsas, coma dins totes los domènis d’escritura que s’i engatgèt parallèlament, de l’univèrs que foguèt sieu, de la plaça que tenguèt dins las letras d’òc dins las annadas 1940 a 1980 : consciéncia viva e pluma agusada.

Haut de page

Bibliographie

1. Obratges de Leon Còrdas

  • Los Macarèls I, Toulouse, IEO, coll. A Tots, 1974.

  • Sèt pans, Toulouse, IEO, coll. A Tots, 1977.

  • La batalha dels teules, Montpellier, Les presses du Languedoc, coll. Espandi occitan, 1979.

  • Los Macarèls II, (La Beguda de Joannes), Toulouse, IEO, coll. A Tots, 1982.

  • L’occitan fondamental, Apreni lèu-lèu l’occitan, IEO, Toulouse, 1974.

2. Revistas

Tèrra d’òc

Cordes, Léon, « A la conquista d’un public », n° 6-7-8, setembre 1940.

Camproux, Charles, « Lo barrullaire », n° 10, oct 1940.

Boussac, Andriu-J., « L’ironda perduda », n° 11, nov. 1940.

Cordes, Léon, « Respelida », n° 11, nov. 1940.

Cordes, Léon, « Fangas e fum, novèla de L.C. », n° 3, març 1940.

Boussac, Andriu-Joan, « Lo Perón », n° 10, octobre 1940.

Eyssavel, Paul, « Dafnis e Cloe », Oc, genier, març 1941, supp. au n° 41.

Mouzat, « Retorn en Lemosi », Oc, julhet, agost, setembre 1941, supp. au n° 42.

Boussac, Andriu-J., « La Fabrica », supp. au n° 24. octobre-novembre-decembre 1941.

Galtier, Carle, « La cançoun perdudo, counte», n° 45, setembre 1943.

Loubet, Jóusé, « Batisto Bounet », n° 52, abril 1944.

Rouquette, Max, « Dins la boca del pòble d’òc », nos 21, 31, 35, 41, 51, 56, 61 de 1942 a 1945.

L’Ase Negre

Lagarde, Pèire, « Jorns d’automne », L’ase negre, n° 13, nov. 1947.

Lafont, Robèrt, « La votz », L’ase negre, n° 11, julhet-agost 1947 ; « Joan Larsinhac » ; Occitania, n° 6, julhet 1948.

Allier, Max, « Lenga d’oc, lenga dau poble », L’ase negre, n° 11, julhet-agost 1947.

Vidal, Jaume, « Lo banh », L’ase negre, n° 14, dec. 1947.

Occitania

Còrdas, Leon, « La corrida », Occitania, n° 1, genier de 1948.

Lagarde, Pèire, « A s’amagar », Occitania, n° 3, julhet 1948.

Eyssavel, Paul, « Lo cavau », Occitania, n° 2, fev.-març 1948 ; « Trimareu », Occitania, n° 5, julhet de 1948.

Roqueta, Max, « Font del Fabre », « Catarina », Occitania, n° 7, oc-nov. 1948.

Lafont, Robèrt, « Per una pròsa d’oc », Occitania, n° 7, nov. 1948.

Camproux, Charles, « Una anja », Occitania, n° 9, fev. març 1949.

Rei-Belenc, Francés, « L’Auriòl », Occitania n° 5, julhet de 1948.

3. Obratges e articles citats

Guillaumin, Émile, La vie d’un simple, 1904.

Barthe, Émile, Los profitaires, Béziers, impr. du Midi, 1922.Rééd. Paris, coll. des Amis de la langue d’oc, 1969.

Barthe, Émile, Teatre poupulari, Béziers, J.-B. Clareton, Pages d’oc, 1922-1927, 2 vol. 

Barthe, Émile, La Nissanenco, rouman de la Terro d’Oc, Béziers, J.-B. Clareton, Pages d’oc, 1938.

Philippe, Charles-Louis, Chroniques du canard sauvage, Paris, Gallimard, 1923.

Lafont, Robèrt, « Per una pròsa occitana », Oc, n° 170, octòbre de 1948, p. 30-32.

Saurat, Denis, Encaminament catar, Toulouse, IEO, Messatges, 1955.

Ragon, Michel, Histoire de la littérature prolétarienne en France, Paris, Albin Michel, 1974.

Allier, Max, recension de Los Macarèls I, Oc, n° 25, automne 1975, p. 83-84.

Negre, Ernest, recension de La batalha dels teules, Gai Saber n° 382, avril 1976, p. 35.

Durand, Jacques, recension de La batalha dels teules, Connaissance du pays d’oc n° 38, juillet-août 1979, p. 64.

Casanova, Jean-Yves, recension deLos Macarèls II, La beguda de Joannes, Jorn n° 11,1984.

Auzias, Jean-Marie, « Une vitrine de l’occitan : la collection ‘A tots’ de l’Institut d’Études Occitanes », Revue Europe, « Littérature occitane », janvier-février 1985, p. 39-48.

Petit, Jean-Marie, Leon Còrdas, Notice biographique, bibliographie, iconographie, témoignages, critiques, études, textes, Béziers, CIDO, juillet 1985, 73 p.

Rouquette, Yves et Camberoque, Charles, « Léon Cordes, homme de parole et d’action », Connaissance du Pays d’Oc, n° 72, 1986, p. 52-57.

Rouquette, Yves, Chroniques de La Dépêche de 1974 à 1982, En occitan, une histoire buissonnière de la littérature d’oc, Valence d’Albigeois, Vent Terral, 2013.

Haut de page

Annexe

Annèxe I

Fangas e fum

Novela de Leon Cordes

Peire Mamet era un rapelat coma los autris. Coma los autris aquela ficuda mobilización l’aviá agantat, arrancat a ço seu, emportat cap a una caserna ont l’avián, un cop de mai, vestit de farda pesuga, uniforma e mal engalhada. De seguit, aviá carrejat suls camins, long dels jorns ardents o de las neits jaladas ont tant-plan la plueja vos rajenta coma de tirons, son sac e tota sa fortuna de fantassin, cagarau mostrós butat al mitàn d’un tropel lanternier cap a d’orisons malvolents. Pro ben grand, un bricón linje, son corps s’era un pauc mai plegat e son agach fisançós era embrumat d’aquel vel de lassiera barrant ara los uelhs d’una generación malastrada. Pariu a totis encara, sabiá rire ça que la quand n’era lo moment, badinar de sa marrana, e contar, estirat sus la palha del cantonament, d’istòrias galhardas per tuar lo temps.

Aquí quora cadun delata de sa situacion civila e se daissa anar a iniciar complasentament lo vesinatge curiós de l’anar de sas amors, li avián ausit dire qu’el tanbén aviá la seuna e que, sens aquelis eveniments del diables, seriá ja maridat e urós que non sai. D’alhors, a l’ora de las letras, receviá pro sovent son envelopa blua ont, d’una escritura nauta e irreguliera, s’era aplicada a pausar son adressa. Enfin, Peire Mamet, lo jorn que sa companha abastet, per i prene los quartiers d’ivern, dins un vilatjot evacuat d’Alsaça, era aquel soldat anonim per la guerra raubat al païs nadalenc, perdut dins un endreit de plueja e de fangasses ont somniava son solelh, lo teulat pairal e sas amors de gojat de vint e cinc ans. I aviá que per una causa que Peire era pas coma totom : jamai l’avián pas vist la cigareta als pots. Aquò estonava tot cop sos colegas, totis fumaires coma de grapauds. Del cop, cadun cercava son amistat per resquilhar, quora se toca lo prest, son degut de tabac. El l’escampilhava ambe jòia, brabe qu’era de natura e de bon afaire coma pas un.

Un ser, apres la sopa, en esperant las letras, eran aquí set o ueit que rambalhavan e se picanhavan coma de mainatjasses. Lo darrier prest era passat dempuei de temps e lo vesin de Peire, un Tolosàn mensonat Pons, a sec dempuei qualquis jorns, cercava una pipa a se faire ofrir. Nostre Mamet ajet lo malur de sortir per el un paquet a pro pena entemenat que siaguet leu mai qu’a mitat devalisat. Ara, Pons cercava de foc :

– Alari, un pauc de ta brasa !

Mas l’autre fasiá del marrit.

– Non, manhac, n’auràs pas ; cada cop que te’n doni me fas perir la cigareta.

Cal pauc de causa per amusar de soldats ; ni Jordi, ni Vidalón, ni Delcasal volgueron pas servir lo Tolosàn que totara fasiá mina de se fachar. Enfin, Mamet trobet l’estec :

– Ten ! des qu’es atal, ne vau alucar una : serà ben lo primier cop ; Vidalón, te prendrai de foc e lo passarai a Pons ; atal tot lo monde serà content.

– Te’n donarai ambe plaser se la fumas en entier.

– Ba !

Se faguet coma s’era dit ; lo joc aviá canviat e la colha jaurela s’amusava que mai. A la primiera pipada, Peire tossiguet, estofeguet, reneguet com un perdut. Lo rire e los fissons gisclavan de pertot. Mas per pica, lançat qu’era de faire veire que l’acabariá ça que la, tornet metre son brasàs als pots e, conscienciosament, faguet montar una bruma de fum.

– A las letras !

L’ora benesida, l’ora sacrada de la jornada era arribada. Dins lo silenci d’una espera un bricón esmoguda, lo portaire de novelas rampelet son monde :

– Peire Mamet !

Era la meteissa envolopa color d’azur, la meteissa escritura longa e babarda. Aqueste cop s’era faita brabament desirar. El la prenguet, l’obriguet rabentament, e, sens faire d’alonguis, se metet a la legir. Ço que i aviá sus aquela babilharda, jamai degun o sapiet pas. Peire, blanc coma la muralha, la repasset dos, tres cops, en tirant furiosament sus sa cigareta, coma se la fasiá responsabla del pus grand malur que poguesse encara davalhar sus el dins la misera d’aquel temps. Era traït, aquò sol ressontissiá a travers l’estil embulhat de la catin a qual aviá cregut. Demoret un moment abrasucat, mas lo cap plen de projets venjatius…

L’aire benleu li auriá fait ben ; volguet pas sortir. Beure, tant-plan li auriá levat l’amaressa qu’emportava sa boca ; se faguet una jòia crudela de daissar pas anar lo megot atudat e marrit, empegat a sos pots… Pei, indiferent a tot ço que virava a son entorn, se botet a escriure d’una man nervilhosa, al craión, sus un fulh arrancat a un cadern raubat dins una escola ont avián cantonat.

Quora siaguet temps de s’anar jaire dins la palha trepejada, escriviá totjorn. Es atal que demoret fins a totas las oras, prep del lum ateunhit d’una d’aquelas calelhas inimaginablas que fan partida de l’aquipament d’una escoada… Quora se vejet sol, creguet un moment qu’anava plorar… Es, alavetz, que penset a sortir una autra cigareta e, tira que tiraràs, acabet l’orre prefait impausat per sas amors perdudas. Quatre o cinc cops la daisset atudar, quatre o cinc cops l’aluquet tornamai. E lo fum gris e folhàs se mesclava per a mesura a la negra brumassa de la candela consumida, dont la flamba morissiá doçament.

***

– Mamet fuma com un pompier ! Mamet a mes de vici ! Mamet, semblas la chiminiera de l’usina de Salsinha !

Desempuei, cada jorn, sos companhs fan la farça del fumaire ier improvisat que uei fa coma los autris, amai piri que cap.

– Mamet, quand aniràs en perma, sentiràs talament lo tabac que la pichona se voldrà pas laissar potonejar…

Mas el, indiferent en defora, sortís una cigareta de mai, l’adraca a sa boca torsida per un risolet marrit, e, sens respondre, l’aluca pacientament al megot encara brosent que li ven d’escapar. Pei… parla de quicon mai, mentre que son uelh seguís per abituda lo revolum de fum blu ont pantaissa la tristor de son ama escarnida.

Tèrra d’òc, n° 3, nov. 1940.

Tèxt donat dins la grafia originala de la revista.

Annèxe II

Respelida

Peire Mamet era montat a sa Glorieta. A sos pes, la garriga davalhava doçamenet, penjal de vinhas e d’ermasses ont l’aspic, totara, florissiá. D’aquí entre aquí, s’arrapavan qualquis olius, figuiers, ametliers, un pin o un rampanier fasiá una taca d’ombra, e, de luenh en luenh, s’arborava la flamba d’un cipressier. Pus enlà, la plana s’espandissiá, verda, que sangnava jol solelh de la rama estivenca. S’estirava cap a l’orisón acostumat, e Mamet s’aviset amb plaser que, entre las serras violetas, aquela linha blua era la mar.

Per arrivar a la Glorieta, aviá fait lo torn per la Font, lo Peiral, la Vinha-Granda, Sant-Miquel, l’Oliveta e los Escarlipets. D’aquí estant, podiá, servit per una granda abituda e sa perfecta coneissença de l’endreit, las situar totas, emai ne distinguir d’unas, tot en mesurant lo camin qu’aviá fait. Aquel fraisse que s’arborava enlà, al mitàn de la plana, era la Font ; l’Olivet era pas de mal reconéisser per l’encausa de la barraqueta que son grand i aviá bastida, e i aviá de qué se sentir fier en vejent consí la Vinha-Granda era verda al mitàn de las autras !

Peire Mamet alenet amb força l’aire caud. Es qu’era vertat, es qu’era possible, que siaguesse aquí, al cor d’aquela natura qu’aviá pas pensat de tornar veire, de sentir per sos pes, aquela terra laurada de benedicción, sofla, manhaga, amigassa de tot temps, la terra de sas vinhas ? Per parlar franc, li semblava que viviá un raive meravilhós. Perseguissent son idea ajet un gest coma per faire fugir de davant sos uelhs una mala visión que tot d’un cop lo repreniá, l’assecutava. Sovenir de patiments, de sofrenças, de freg, de danger, d’orror, d’espavent ! De tot aquò se n’era tirat, apres aver fait ço que deviá : aviá agut la bona astrada de tornar liure e senze al vilatge nadalenc. Es vertat que i aviá que qualquis jorns qu’era aquí, talament qu’encara sas ideas eran foscas, a belis moments, e qu’un vòmit li montava als pots, coma un renec, quand pensava à aquò… Aquò ? la guerra engana ! traitisa ! maledicción, assassinat ! Un temps li aviá semblat que sa testa, son cor, sa carn, serián incapables, d’aquí a l’en davant, de sentir, de trapar que que siá bel e bon, de creire…

E aquí que totara se retrobava, se sentissiá viure, polsar tornamai, per aquesta fin de matinada daurada, al contacte d’aquesta terra d’amor, a la vista d’aquesta natura apasimaira. Li semblet qu’entre son esperit e lo campestre seu un vielh ligam se tornava nosar, coma qui revei, amb emoción, un amor de joventut dont aviá pas jamai desesperat al fons de son cor. Una força secretosa revolumava dins son vanc : besonh de conquistar e besonh d’arrapar que li veniá d’autris cops, al pensament del trabalh, de la susor qu’aviá enmerçat per Ela, la maire noiriça dels freules umans.

Dins la debaruta de l’ora, Peire Mamet sosquet amb fiertat que demorava, el, païsan, emanación de sa terra fegonda. Quora tot s’escrancava e cridava assistença, se sentissiá ça que la solide dins ço seu. Totis los que ier los avián mespretzats, renegats, ignorats, los paisanasses – que disián – uei los lausavan, los pregavan, los benesissián, e aquò lo faguet rire dolçament amb la siauda assegurança dels omes del defora. Oc, era plan aquò la Patria retrobada, sa terra, son solelh, una lenga tindaira, eiretatge de personalitat, de cultura, d’umanitat, de libertat e de franquisa (car te rememoret alavets, mon car Mamet, qu’en un moment de solàs, pendent aquela revolumada dont sortissem tot just, a l’asart d’un cantonament, aviam parlat ensemble de Mistral), una tradición onesta, una civilisación sanitosa, ont la foliá dels omes de guerra aviá pas ni presa ni poder.

Un còp de mai, Peire mesuret l’orisón d’una larga mirada… Pei se viret tornamai vers sa Glorieta, sa vinha manhaga, e, d’un pas segur, a travers la laurada, remontet cap al camin. De temps enlà s’arrestava per agachar un grefe, derrabar una caussida, assolidar un paissel, palpar los rasims, e, d’un gest amorós, pesar devotament los espers de la vendémia.

Léon Cordes, Tèrra d’òc, n° 4, dec. 1940.

Tèxt donat dins la grafia originala de la revista.

Haut de page

Notes

1 Réédition des chroniques littéraires publiées par Yves Rouquette dans La Dépêche de 1974 à 1982, En occitan, une histoire buissonnière de la littérature d’oc, Valence d’Albigeois, Vent Terral, 2013.

2 « ‘A tots’, dix ouvrages en prose, un pari déjà gagné, une aventure à soutenir de toute force », op. cit., p. 37-38.

3 Sul roman « La Route des Gueux », veire infra. Robèrt Lafont ditz, dins l’ome-natge que li fa en 1985, que Leon Còrdas, del temps de L’Ase Negre, noirissiá « de son sentit de la fraternitat dels explotats, sa fidelitat a 1907, qu’èra a n’escriure l’istòria. », Leon Còrdas, Jean-Marie Petit, Béziers, CIDO, juillet 1985, p. 43.

4 Dins Oc, n° 251, automne 1975, Max Allier saluda Leon Còrdas comme un vertadièr « òme d’òc » e non pas un intellectual qu’auriá apresa la lenga : « Sa lenga ten la sabor d’un parlar viu, lo qu’espelissiá sus las bocas de sos paires e d’aquel pòble dau Menerbés que n’es filh. Un parlar ruste que s’i rescòntra pas res de farlabicat, ruste tant coma lo sòu de son terraire e son mestièr de vinhairon. » (Sa langue a la saveur d’un parler vivant, celui qui fleurissait dans la bouche de ses pères et de ce peuple du Minervois dont il est le fils. Un parler rugueux où l’on ne rencontre rien d’artificiel, rugueux comme le sol de son terroir et son métier de vigneron.)

5 « Le devoir de l’écrivain est de témoigner de son époque, pour son époque. »

6 Tèrra d’òc, la revista de la Sociétat d’Éstudis Occitans dirigida per A.-J. Boussac e publicada de genièr 1940 a agost 1945.

7 Còrdas ten la rubrica « Cronica del teatre d’òc » de Tèrra d’òc.

8 « Dins la boca del pòble d’òc » es lo títol de la rubrica tenguda per Max Roqueta dins Tèrra d’òc (7 articles de 1942 a 1945) : causas vistas e ausidas per lo jove metge dins la societat rurala que frequenta a l’entorn d’Aniana en Lengadòc. L’òbra avenidoira se i legís en filigrana.

9 Leon Còrdas : « Ja avem d’escrivans que comptan, avem qualques romans, avem de poetas qu’an trobat d’accents moderns e de crits joves, avem un teatre que val çò que val, e tot aquò florís un pauc mai cada jorn, mas l’exaltacion de la literatura populara a fait que, gaireben de partit pres, la produccion literària occitana es demorada dins sa mejana en reire de sas vesinas, en reire de las concepcions modèrnas que semblan de nos faire paur. » (Nous avons déjà des écrivains qui comptent, nous avons quelques romans, nous avons des poètes qui ont trouvé des accents modernes et de jeunes cris, nous avons un théâtre qui vaut ce qu’il vaut, et tout cela fleurit un peu plus chaque jour, mais l’exaltation de la littérature populaire a fait que, presque de parti pris, la production littéraire occitane est restée dans l’ensemble en arrière de ses voisines, en deça des conceptions modernes qui, dirait-on, nous font peur.) « A la conquista d’un public », Tèrra d’òc, n° 6-7-8, setembre 1940.

10 A.-J. Boussac. Bonas paginas de La Fabrica in Òc, oct., nov. dec. 1941, supplément à Tèrra d’òc, n° 43. « L’ironda perduda », conte, Tèrra d’òc, n° 12, dec. 1940 ; « Lo Perón », novèla, n° 10, octobre 1940.

11 Tèrra d’òc, n° 52, abril 1944, estudi sus Batisto Bonnet de Jóusé Loubet.

12 Paul Eyssavel revira Longus (Dafnis e Cloe) Oc, genier, febrier març 1941, supplément au numéro 41 de Tèrra d’òc, Jean Mouzat Giraudoux (Siegfried et le Limousin), Oc, julhet, agost, setembre 1941, supplément au numéro 42 de Tèrra d’òc.

13 Tèrra d’òc, n° 45, setembre 1943, La cançoun perdudo, counte per Charle Galtier.

14 « Lo barrullaire », Tèrra d’òc, n° 10, oct 1940.

15 « Fangas e fum », novèla de Leon Còrdas, Tèrra d’òc, n° 3, març de 1940. Lo tèxt es citat en annèxe I.

16 Un « capèl » de la redaccion en naut de pagina ditz : « Amb aqueste numèro començàm la publicación d’obras d’imaginación (o de troces) ineditas. Voldriàm que nostres co-lauradors s’eforcesson de cercar una dralha nova alloc de trepejar sempre los caminols batuts e rebatuts. Presentam pas aquesta primiera, nimai las que seguirán coma lo model de ço que voldriam véser espelir dins la literatura occitana. Metem que i aje aquí qu’un ensag de recerca cap a de formulas o de procedits mens coneguts de ço nostre e mai liures. D’alhors pregam nostres legeires de n’èsser los jutges… » (Avec ce numéro nous commençons la publication d’œuvres d’imagination (ou d’extraits) inédites. Nous voudrions que nos collaborateurs s’efforcent de chercher une nouvelle voie au lieu de toujours fouler les sentiers battus et rebattus. Nous ne présentons pas cette première nouvelle, ni celles qui vont suivre, comme le modèle de ce que nous voudrions voir naître dans la littérature occitane. Mettons qu’il n’y ait là qu’un essai de recherche de formules ou de procédés moins connus chez nous et plus libres. D’ailleurs nous prions nos lecteurs d’en être juges…)

17 « Il se mit à écrire d’une main nerveuse, au crayon, sur une feuille arrachée à un cahier volé dans une école où ils avaient établi leur cantonnement. Quand il fut temps d’aller se coucher dans la paille souillée, il écrivait toujours. »

18 « Respelida », Tèrra d’òc, n° 4, dec. 1940. Lo tèxt es citat en annèxe II.

19 « apaisé par la patrie retrouvée, par sa terre, son soleil, par une langue sonore héritage de personnalité, de culture, d’humanité, de liberté et de franchise… »

20 Robèrt Lafont, « Per una pròsa d’oc », Occitania, n° 7, novembre de 1948. « Pour préparer et aider l’apparition d’une véritable prose occitane originale et digne d’être comparée aux autres proses modernes. »

21 Charles Camproux, « Una anja », Occitania, n° 9, fev. març 1949.

22 Max Roqueta, « Font del Fabre », « Catarina », Occitania, n° 7, oc-nov. 1948.

23 Paul Eyssavel, « Lo cavau », Occitania, n° 2, fev.-març 1948 ; « Trimareu», Occitania, n° 5, julhet de 1948.

24 Pèire Lagarde, « Jorns d’automne », L’ase negre, n° 13, nov. 1947 ; « A s’amagar » Occitania, n° 3, julhet de 1948.

25 Robèrt Lafont, « La votz », L’ase negre, n° 11, julh. agost. 1947 ; « Joan Larsinhac », Occitania, n° 6, julh 1948.

26 Jaume Vidal, « Lo banh », L’ase negre, n° 14, dec. 1947.

27 Francés Rei-Belenc, « L’Auriòl », dedicat « al Mèstre Loís Alibert », Occitania, n° 5, julhet de 1948.

28 Leon Còrdas, « La corrida », Occitania, n° 1, genier de 1948.

29 « Une scène de vie languedocienne, avec sa brutalité, ses couleurs tranchantes et son sang bouillant. »

30 « Espanhòl d’aquí » es una pèça de Michel Cordes, filh de Leon, que tracha de la vida d’una familha d’Espanhòls venguts en Lengadòc coma obrièrs agricòls (La Rampa-TIO, 2006, 2015).

31 Aquelas expressions son trachas del prefaci de Sèt pans. (1977)

32 Dins L’Ase Negre del 8 d’abrial de 1947, Enric Espieux signa un article bèl sus « Farrebique, primièr film occitan ». « Farrebique, çò ditz, aquò’s la vida, la vida fonsa de nòstre terraire. Lo ritme suau e movedís dei sasons, l’envam dei trabalhs de totei lei jorns i regolan plan-plan lòng deis oras cantarelas. Es l’istòria d’una familha occitana coma totei lei familhas, la vòstra, la mieu. Lei gèsts, pausadís e segurs, s’alargan fins qu’a l’infinit. »

33 Entre novembre 1984 e genièr 1985, un escambi de letras entre Leon Còrdas e Jean Sagnes trachan de la possibilitat d’editar (als EFR, Éditeurs français réunis) lo manuscrit de La Route des Gueux servat al CIDO. Còrdas pensa qu’es un obratge de vulgarizacion que podriá marchar, estent que la question viticòla en Lengadòc es totjorn d’actualitat e que d’un autre costat sa pèça Menèrba 1210, mesa en scèna per Claudi Alranq, s’anóncia plan per julhet 1985. La letra del 23 de novembre 1984 es acompanhada d’un memorandum de doas paginas en occitan que fa l’istoric del manuscrit : « Perqué e cossí foguèt escrita La Route des Gueux. » Mercejam amistosament Jean Sagnes de nos aver comunicat e permés de citar aqueles documents de primièra man.

34 « Maridat, e ma femna foguent de Montolièrs, a 3 km d’Argelièrs, que son papeta èra estat dels « 87 d’Argeliers », foguèri, d’aquel moment, ligat al vilatge de Marcelin Albert en faguent pacha amb la tropa « Les gais vaudevillistes » (sic) fondada per Marcelin Albert e que de paire en fils, aviá contunhat d’existir. Amb aquela tropa e son director A. Raisseguier (ex cantaire de jazz professional) montèrem e joguèrem dins la region, après Argelièrs, doas peças meunas : Cantarana, 3 actes, 4 tablèls e Remembrança, un prològ e dos actes.

Aquí èri, doncas, en relacion d’amistat, e puèi per una documentacion a la sorga dirècta dels qu’avián viscut e tanplan « fait » 1907 : en primièr Cathala (son pichòt filh jogava dins la tropa) e Loïs Blanc, l’ancian farmacian que foguèt president del Comitat n° 2 e redactor del Tocsin. » 23 de nov. 1984. A J. S.

35 « Aquò’s atal que dintrèri, cap a 1947, en relacion dirècta amb Philippe Lamour. Lamour, èra an aquela epòca, un personatge al còp oficial e promotor d’idèas nòvas ! Atal vesiái maumens lo Secretari general de la dinamica CGA (Confederacion generala de l’Agricultura). Lamour èra l’òme de las « grandas idèas »… S’apassionèt sul còp, e i portèt son patronatge de pes, per la granda idèa d’un film sus 1907. A sa caucion – qu’avià ja per avança la de Loïs Blanc e de Carles Caffort, deputat d’Erau, President-Fondator del Sindicat « Minervois », amic personal e de ma familha – s’ajustèt la del president de la CGVM qu’aviái rescontrat a Narbona per li expausar lo projècte. La firma « Ciné-France » (en acòrdi amb lo servici tecnic cinema de la CGA) faguèt un projècte – es aquela firma qu’aviá sortit lo cort-metratge sus Le Minervois. La CGVM s’engagèt a trobar un finançament de basa de 10 millions- de 1947-1948. » 23 de nov. 1984. A J. S.

36 Lo deputat comunista Raol Calàs aviá legit « amb grand gaug » lo manuscrit per los EFR, e propausava de tornar trabalhar lo manuscrit per publicacion, mas Còrdas explica que las circonstàncias li permetèron pas de se i consacrar.

37 « Mas d’aquel moment me batiái, ieu, après aver quitat lo Menerbés – vengut jardinièr a Lattes – amb d’imperatius de sobrevida terribles, las inondacions ( !), a còp de jornadas interminablas, secutat de totas las misèrias ! E aquò prenguèt lo dessús, lo temps passèt sens trobar lo de se trachar d’aquel manuscrit, e l’espèr de realisacion cinematografica se perdent dins aquela vida vidanta materiala e lo crèba-còs que s’en seguìs… Lo manuscrit finiguèt dins un canton e ai pas cap enveja de lo publicar ». 23 de nov. 1984. A J. S.

38 La Route des Gueux es per paréisser (Christian Salès, groupe Oc).

39 Òc, abril 1951, La Vespa, p. 15-20.

40 Ives Roqueta rapòrta aquela paraula de Leon Còrdas : « En 1946, quand je travaillais à Sèt Pans que j’appelais encore Lo pan de cada jorn, j’avais en tête la guerre d’Espagne, le front populaire, la guerre de 14 où mon père que je n’avais pas connu était mort. J’avais davantage comme référence au monde de la terre, nature et hommes, le Steinbeck des Souris et des hommes et des Raisins de la colère que Mistral que je savais par cœur pourtant et que d’Arbaud ou que Mouly. » « Léon Cordes, homme de parole et d’action », Connaissance du Pays d’Oc, n° 72, 1986.

41 Oc, n° 170, octòbre de 1948, Robèrt Lafont, « Per una pròsa occitana », p. 30-32.

42 L’occitan fondamental, Apreni lèu-lèu l’occitan, IEO, nd. 48 p.

43 Oc, n° 174, octòbre de 1949, « Condicions de la pròsa d’òc » « Est la conscience du peuple. Il tient de lui le meilleur de son esprit, il en est engrossé et inspiré ».

44 « Une prose où éclatent son rire et ses pleurs amers, où se reflètent sa vie quotidienne, son esprit et son destin, tout ce qui le déchire ou le secoue, le blesse ou lui donne du plaisir… »

45 Emili Barthe (1874-1939), nascut a Nissa (Nissan-lez-Ensérune), visquèt a Besièrs e escriguèt sens relambi per lo teatre lengadocian e d’en primièr per sa tropa, « Lo brès besierenc », de nombrosas carnavaladas, pèças en un acte o en tres actes. Teatre poupulari, J.-B. Clareton, Pages d’oc, 1922-1927, 2 vol. 

46 La Nissanenco, rouman de la Terro d’Oc, Béziers, Ediciu de las pajos d’Oc, 1938, 310 p. La Nissanenco es lo sol roman que Barthe escriguèt en fin de vida, levat un roman inacabat sus 1907 (autra semblança amb Còrdas) que lo manuscrit ne sembla perdut.

47 « Sèt Pans de Léon Còrdas, Néo-réalisme pas mort. Lettre suit ». « Je ne souhaite qu’une chose de tout cœur ; c’est que la télévision le donne vite à voir et à entendre partout. Je viens de le lire exactement comme j’aurais dû le voir sur un écran. Comme quand j’avais seize ans j’avais vu au ciné Riz amer ou Deux sous d’espoirs… » Op. cit., p. 221.

48 « Il faut sept pains pour passer la semaine, un chaque jour, et c’est le dernier qui est le plus dur à payer. » (p. 196)

49 Émile Barthe, Los profitaires, Béziers, impr. du Midi, 1922.

50 Jean-Marie Auzias, « Une vitrine de l’occitan : la collection ‘A tots’ de l’Institut d’Études Occitanes », Europe, janvier-février 1985, Littérature occitane. p. 39-48.

51 Europe, p. 44. Emile Guillaumin, 1873-1951, Ygrande (Allier), es un escrivan-pagés, sindicalista agricòl de la primièra ora. Es mai que mai l’autor de La vie d’un simple (1904).

52 Connaissance du pays d’oc, op. cit., 1986, p. 53.

53 E mai diguèsse, a prepaus de las secadas e de las geladas de l’après-guèrra que lo vilatge ne patiguèt : « Ne reprendrai pas mos Sèt pans, si que non per prefaciar la seguida » (Je ne reprendrai pas mon Sèt Pans, sinon pour préfacer la suite). La batalha dels teules, op. cit., p. 35.

54 Lo vilatge quilhat es de segur Menèrba, evocat tre la primièra novèla : « Menèrba, lòc naut e nau de ròc getada entre capvals ! » (Minerve, haut lieu et nef de rocher jetée entre deux vallées) (p. 13), luòc omnipresent dins la pròsa tant coma dins la poesia de Còrdas. « L’arpentaire » comença : « Lo vilatge es quilhat sul puèg coma un gròs cagaraul » (Le village est perché sur la colline comme un gros escargot). Los Macarèls I, p. 39.

55 « Daniel […] èra un dròlle de 68. De la revelacion de 68 : coma un aigat que fa petar totas las restancas, remet en question las idèas impausadas, las messòrgas oficializadas, falsas moralas e falsas dignitats. 68 que revelèt Occitania a sa joventut amb la paraula d’òc alargada davant l’opinion. E tot aquò èra bon, arribe que plante ! » (Daniel était un jeune de 68. De la révélation de 68 : comme une inondation qui démolit tous les barrages, remet en question les idées imposées, les mensonges officiels, les fausses morales et les fausses dignités. 68 qui révéla l’Occitanie à sa jeunesse, avec la parole d’oc largement diffusée dans l’opinion). La batalha dels teules, p. 40.

56 Dins Gai Saber n° 382 d’abril 1976, p. 35, Ernest Negre saluda, dins sa recension de l’obratge, la generositat de l’engatjament : « la reire-conquista del païs, de la dignitat, de l’anma occitana » e mai que mai « la lenga poderosa e fòrta de color. » Dins Connaissance du pays d’oc de julhet-agost 1979, Jacques Durand escriu : « Œuvre engagée dans la lutte pour la langue d’oc, La batalha dels teules répond au même souci de combat, mais sans oublier que la littérature n’est pas une accumulation de slogans. Ce roman est un vrai roman. ».

57 « S’aquò vos enfècta, podètz passar un capitol enlà ! » (Si ça vous ennuie, vous pouvez passer au chapitre suivant !) (p. 70).

58 « au premier coup d’œil est informe, ne tient pas debout. »

59 « Comment pourrais-tu, toi, être objectif ? Quand tu te rends compte qu’à travers une prise de conscience qui ne t’appartient pas en propre, la moindre anecdote est l’image du roman d’un peuple, d’un pays ? » (p. 16).

60 La polemica visa pas Còrdas personalament mas la politica editoriala de l’IEO de las annadas 80 : « La colleccion A Tots, dempuei quauquei temps, sembla s’especializar dins de libres que son, ben maugrat élei, a la frontiera de la literatura, de l’etnotèxt-testimòni, dau regret passeista, planh e tristesa d’una tèrra, d’una lenga, d’un païs que moris. » (La collection A Tots, depuis quelque temps, semble se spécialiser dans des livres qui sont, bien malgré eux, à la frontière de la littérature, de l’ethnotexte-témoignage, du regret passéiste, nostalgie et tristesse d’une terre, d’une langue, d’un pays qui meurt.).

61 Jorn n° 11, 1984, p. 75-76.

62 « Finalement de quoi est-il question dans Los Macarèls II ? Le premier chapitre nous l’indique : le pays, éternellement le pays, la mort de sa langue et de sa civilisation… ».

63 « Los Macarèls est bâti sur un mythe. Sur le mythe de la littérature occitane, une certaine littérature qui se veut parole pour son pays, qui veut le défendre, le protéger… ».

64 « Car mes récits sont d’abord faits de vie commune. Le pays commence par le voisinage… On y est témoin avec les mains comme avec la parole : parole, bois, foyer, les mots de la langue y sont présents comme les cals dans les mains… » Los Macarèls (ara direm : L. M.) II, p. 26.

65 L. M. I, p. 91-112.

66 L. M. II, p. 75-93.

67 « La vie que l’on supporte et qui se déroule comme un conte cruel. » L. M. II, p. 93.

68 L. M. II, p. 57-74.

69 L. M. II, p. 49-56.

70 L. M. I, p. 39-46.

71 L. M. I, p. 47-52.

72 L. M. II, p. 101-130.

73 Lo primièr, lo tornèri dire tot còp a l’anar de mas corridas de contaire […] Atal lo dirai un còp de mai. Disi plan dire-contar, coma s’èrem acampats per aquò far. » (Le premier, je l’ai dit et redit au hasard de mes tournées de conteur […] Ainsi je vais le dire une fois de plus. Je dis bien dire-conter, comme si nous étions réunis pour ce faire.) L. M. II, p. 61.

74 « Des spécialistes travaillaient, faisaient des recherches, et les poètes s’en faisaient l’écho. » Los Macarèls II, p. 60.

75 Còrdas cita sens ne donar ni l’autor ni lo títol qualques vèrses del poèma de Saurat paregut en 1955 (IEO Messatges), plan legit e comentat dins la premsa occitana, en fasent qualques modificacions de tèxt (escriu : sabes per sabètz/ fondamenta per fondament / mai pour mes). « Sabètz pas que lo còs es pas qu’una bastissa / ont viu l’arma/ que cada pecic de carn que podètz tocar / es que lo fondament d’una car mes subtila / que s’estend al delà de çò que l’uelh pòt veire / o la man tocar… » (Vous ne savez pas que le corps n’est rien qu’une bâtisse / où vit l’âme / que chaque morceau de chair que vous pouvez toucher / n’est que le fondement d’une chair plus subtile / qui s’étend au-delà de ce que l’œil peut voir / et la main toucher…) (Traduction d’Henri Espieux, p. 99).

76 L. M. I, p. 19-38.

77 « La parole était notre espace, elle nous gonflait la bouche, nous donnait le souffle, faisait monter comme les Pyrénées, au bout des vignes, au bout du vent, la barre horizontale de la Serre d’Oupia ».

78 « M’èri afrairat amb los estudiants del Novèl Lengadòc. Ligant amb Max Roqueta lo sòmi d’un matin de poesia e d’amistat, aviá descobèrt amb Camprós […] totas las esperanças de l’occitanisme. » (J’avais fraternisé avec les étudiants du Nouveau Languedoc. Liant avec Max Rouquette le songe d’un matin de poésie et d’amitié, j’avais découvert avec Camproux […] tous les espoirs de l’occitanisme.) Los Macarèls I, p. 33.

79 « Tout à coup il jetait son chapeau à terre. À ses pieds :Si tu sautes par-dessus ce chapeau, tu es un homme mort !” Et il recula d’un pas. Un défi ? Ne pas sauter le chapeau ? Tiens ! C’est chose faite… La lame se planta dans son ventre de bas en haut. Comme un soc rageur ouvre un sillon sanglant. »

80 L. M. II, p. 25-47.

81 « Pro per un rafi », « Ma vie, avait-il dit, on en ferait un roman… » L. M. II, p. 30.

82 « Et le voilà perdu derrière ses brebis par monts et par vaux. Le premier jour, avant de partir, ils lui donnèrent une poignée de châtaignes. Pensez s’il eut vite fait de les avaler ces châtaignes ! » L. M. II, p. 31.

83 « Celui qui assassina le président Sadi Carnot à Lyon le 24 juin 1894 ! » L. M. II, p. 38.

84 Charles-Louis Philippe, Chroniques du canard sauvage, Paris, Gallimard, 1923. Citat per Michel Ragon, Histoire de la littérature prolétarienne en France, Paris, Albin Michel, 1974.

85 La longa nòta de Còrdas sus Caserio (L. M. II, p. 40-42) punta la veritat istorica del personatge e s’acaba per una citacion de L’Homme révolté de Camus.

86 « Ainsi, comme il se doit, on posa d’abord les quatre premières rangées de tuile, à reculons, en commençant contre le mur et en montant. Puis à nouveau quatre autres rangées. Un autre homme habile prit alors la suite aussitôt ce rang formé, puis un autre, puis un autre de même, comme des moissonneurs qui se suivent dans un champ, des faucheurs dans un pré, à la file, alignés en biais et marchant ensemble. La toiture, suivant leur mouvement, se couvrait par belles rangées, comme des moissons, comme un pré fauché, comme une terre labourée avec les sillons bien ajustés qui s’alignent sur le fil. » (p. 105-106)

Haut de page

Pour citer cet article

Référence papier

Claire Torreilles, « Leon Còrdas, « romancièr testimòni » »Revue des langues romanes, Tome CXX N°2 | 2016, 353-378.

Référence électronique

Claire Torreilles, « Leon Còrdas, « romancièr testimòni » »Revue des langues romanes [En ligne], Tome CXX N°2 | 2016, mis en ligne le 01 février 2018, consulté le 21 janvier 2022. URL : http://journals.openedition.org/rlr/409 ; DOI : https://doi.org/10.4000/rlr.409

Haut de page

Auteur

Claire Torreilles

Université Paul-Valéry (Montpellier III)

Articles du même auteur

Haut de page

Droits d’auteur

Licence Creative Commons
La Revue des langues romanes est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Haut de page
  • Logo Presses Universitaires de la Méditerranée
  • OpenEdition Journals
Rechercher dans OpenEdition Search

Vous allez être redirigé vers OpenEdition Search